Reddit ijtimoiy yangiliklar sayti Aut-Skerris deb nomlangan Britaniya orollaridan birida yashovchi, sinfdoshlari ham, do‘stlari ham bo‘lmagan 10 yoshli Aron Andersonga tabrik xatlarini yuborishni so‘rab, o‘zining foydalanuvchilariga murojaat qildi. Bu haqda Mashable xabar bermoqda.
Orol aholisi 65 kishidan iborat xolos. Aron ikki xonali binoda joylashgan maktabning yakka-yu yolg‘iz o‘quvchisi hisoblanadi. U o‘zlashtirayotgan barcha fanlardan bir nafar o‘qituvchi saboq beradi. O‘rdaklar, qo‘ylar va kuchuk Aronning eng yaxshi do‘stiga aylangan.
Nashrda xabar qilinishicha, ushbu xayrli ish ustida Reddit moderatorlaridan biri ishlagan. U portalda o‘zining xabarini nashr etdi va bola bilan bog‘lana olib, uni qo‘llab-quvvatlay oladigan Reddit’ning barcha foydalanuvchilariga murojaat qildi. “Men uning yuzida kulgu paydo bo‘lishini juda ham xohlayman”, ― deb yozdi moderator.
Ma’lumot uchun. Reddit portali 2005-yilda ishga tushirilgan. Sayt munozaralar tarmog‘idan tashkil topgan bo‘lib, unda resursdan foydalanuvchilar o‘zining izohlarini chop etib boradi, havola va birlamchi manbalarga dalil keltirib, tasvirlar bilan o‘rtoqlashadi. Resurs, o‘zining mashhur shaxslar ishtirokidagi savol-javob uyushtirish sessiyalari bilan mashhur bo‘lgan. Misol uchun, Reddit foydalanuvchilarining savollariga Microsoft asoschisi Bill Geyts, fizika nazariyachisi Stiven Xoking va yozuvchi Nil Geymanlar javob bergan.
Izoh (0)