Reddit ижтимоий янгиликлар сайти Аут-Скеррис деб номланган Британия оролларидан бирида яшовчи, синфдошлари ҳам, дўстлари ҳам бўлмаган 10 ёшли Арон Андерсонга табрик хатларини юборишни сўраб, ўзининг фойдаланувчиларига мурожаат қилди. Бу ҳақда Mashable хабар бермоқда.
Орол аҳолиси 65 кишидан иборат холос. Арон икки хонали бинода жойлашган мактабнинг якка-ю ёлғиз ўқувчиси ҳисобланади. У ўзлаштираётган барча фанлардан бир нафар ўқитувчи сабоқ беради. Ўрдаклар, қўйлар ва кучук Ароннинг энг яхши дўстига айланган.
Нашрда хабар қилинишича, ушбу хайрли иш устида Reddit модераторларидан бири ишлаган. У порталда ўзининг хабарини нашр этди ва бола билан боғлана олиб, уни қўллаб-қувватлай оладиган Reddit’нинг барча фойдаланувчиларига мурожаат қилди. «Мен унинг юзида кулгу пайдо бўлишини жуда ҳам хоҳлайман», ― деб ёзди модератор.
Маълумот учун. Reddit портали 2005 йилда ишга туширилган. Сайт мунозаралар тармоғидан ташкил топган бўлиб, унда ресурсдан фойдаланувчилар ўзининг изоҳларини чоп этиб боради, ҳавола ва бирламчи манбаларга далил келтириб, тасвирлар билан ўртоқлашади. Ресурс, ўзининг машҳур шахслар иштирокидаги савол-жавоб уюштириш сессиялари билан машҳур бўлган. Мисол учун, Reddit фойдаланувчиларининг саволларига Microsoft асосчиси Билл Гейтс, физика назариячиси Стивен Хокинг ва ёзувчи Нил Гейманлар жавоб берган.
Изоҳ (0)