Йилнинг ибратли 12 воқеаси (фото)

Бугунги урушлар, намойишлар ва сиёсий эврилишлар замонида инсонийликни сақлаб қола олиш ва оғир лаҳзаларда яқинларга ёрдам қўлини чўза билиш жуда муҳим. Чунки энг кичик яхши амал ҳам инсонларга жаҳоннинг барча бойликларидан-да кўпроқ меҳр ва қувонч тақдим этади, деб ёзади AdMe.

Қуйида 2015 йил давомида амалга оширилган ва бутун дунёда одамларнинг олқишига сазовор бўлган меҳр-муҳаббатга тўла ибратли воқеалар келтирилган.

Қутқаргани учун миннатдорчилик

Кўп йиллар аввал Майк Хюз исмли ўт ўчирувчи 9 ойлик Даниэл Дэвисонни ёнғиндан омон олиб чиққанди. Ёнғиндан 17 йил ўтиб қиз ўзининг қутқарувчисини битирув оқшомига таклиф қилди ва таъсирли нутқ ўқиди: «Майкнинг бугунги тадбирда иштирок этаётгани мен учун жуда муҳим. Ҳаммаси бутунлай бошқача бўлиши мумкин бўлганини ўйласам, ҳар доим бахтиёрлигимдан йиғлайман. Агар сиз бўлмасангиз, мен бу ерда бўлмасдим».

• Америкалик қиз ўзини 17 йил аввал ёнғиндан қутқарган ўт ўчирувчини битирув оқшомига таклиф қилди

Туғилган кун совғаси

Аутизмдан азият чекувчи 6 ёшли Гленн Буратти ўз туғилган кунини байрамона нишонлашга қарор қилди, бироқ таклиф қилинган меҳмонларнинг ҳеч бири тантанага келмади. Унинг онаси бу ҳақда Facebook’да хабар қолдирганидан сўнг, болакайни табриклаш учун полициячилар ва ўт ўчирувчилар гуруҳи келиб, совға улашди.

Ҳаммани қарияга ёрдам беришга чақирган йигит

Темирйўл назоратчиси Жой Сайганик икки ўсмир кекса бир кишининг уйини масхара қилаётганини кўриб қолди ва буни шундоқлигича қолдирмасликка қарор қилди. Жош Facebook’да кўнгилларни ёрдамга чорлаб, қариянинг уйини оқлашда ёрдам сўради. Инспекторнинг чақирувидан сўнг уйни таъмирлаш ишларида 95 киши қатнашди.

Дайди итнинг сўнгги кунларини қувончга тўлдирган қиз

Колумбусда истиқомат қилувчи Никол Эллиот давосиз дардга чалинган Честер лақабли итга хўжайини кераклиги ҳақидаги эълонни ўқиб қолди. Қиз дайди итнинг сўнгги кунларини қувончли ўтказиш учун уни ўз қарамоғига олди. Честер ойналари очиқ машинада сайр қилишга, хот-догларни паққос туширишга ва ҳатто спа-ванна қабул қилишга улгурди.

Биргина фотосурат сабаб ҳаёти ўзгариб кетган уйсиз бола

Филиппиннинг Мандауэ шаҳрида яшовчи Жойс Гилос-Торрефранка исмли талаба қиз McDonald’s ресторани ёруғида уй вазифасини қилиб ўтган уйсиз болани суратга олди. Талаба бу суратни ижтимоий тармоқларга жойлаштирганидан кўп ўтмай, одамлар болакай учун пул юбора бошлади. Айнан шу сурат сабабли уйсиз бола Филиппин сиёсий арбобларидан стипендия ва кўмак олди.

• Кўчада дарс тайёрлаётган қашшоқ оила фарзандининг сурати Интернетни ларзага солди

Бир киши ҳамма учун, ҳамма бир киши учун

Йигит битирув оқшомига бора олмади, бироқ битирув оқшоми унинг олдига келди.

Чўкаётган буғу боласини қутқариб қолган бола

Бангладешнинг Нокхали округи яқинида юз берган сув тошқинлари вақтида Билол исмли болакай чўкаётган буғу боласини кўриб қолди. У ўз ҳаётини хавф остига қўйиб, жониворни қутқарди.

Ўйинчоқлар дўконини болаларга совға қилган аёл

Нью-йорклик Кэрол Сачман банкротлик ёқасида турган ўйинчоқлар дўконини сотиб олиб, унинг барча маҳсулотларини уйсизларга кўмак бериш департаментининг шаҳар бўлимига юборди.

Ҳимоясига бутун Россия отланган Петербургнинг энг яхши чиптачиси

Виктор Петрович Лукьянов Россиянинг Санкт-Петербург шаҳрида чиптачи бўлиб ишлайди. У ўзининг яхши ҳислатлари билан ном чиқарган — йўловчиларга 79 тилда миннатдорчилик билдирарди, пенсионерларга жой бўшатган йўловчилар ўрнига ўзи йўл ҳақини тўлайди ва ҳоказо. Қоровулларнинг совуқ муомаласидан чарчаган чиптачи бир куни ишдан бўшаш ҳақида ариза ёзди. Бироқ уни кўпчилик қўллаб-қувватлади ва раҳбарият ундан ишда қолишни сўради.

Ногирон неварасини беш йил опичлаб юрган буви

Хитойнинг Сичуань вилоятида истиқомат қилувчи 66 ёшли буви 14 ёшли ногирон неварасини опичлаб, беш йил давомида ҳар куни мактабга қатнади. Ўтган давр мобайнида у тоғ сўқмоқлари бўйлаб тўрт минг километрдан ортиқ йўл босди. ОАВ ва ҳукумат бу ҳолатдан хабар топганидан сўнг, оила мактабга яқин уйга кўчиб ўтди, қизалоққа эса, у мустақил равишда ҳаракатлана олиши учун, ногиронлар аравачаси совға қилинди.

Эгасиз жониворларни боқиш учун хавфли ҳудудда қолган япон

Наото Мацумура 2011 йилги зилзила ва цунамидан сўнг ёпиқ ҳудуд деб эълон қилинган Фукусима яқинида яшашдан қўрқмаган ягона инсон ҳисобланади. У бошқа аҳоли билан бирга шаҳарни тарк этганди, бироқ қаровсиз қолган жониворларга ғамхўрлик қилиш мақсадида қайтишга қарор қилди.

Уйли бўлган бошпанасиз ит

Россиялик таниқли актёр Константин Хабенский ўзининг зотсиз жониворини бошпанасиз итлар уйидан олган вақтида у иркит ва касал эди. Актёр уни тозалаб ювинтирди, даволади ва ардоқлади. Ит қоронғуликдан қўрқади, шу сабабли Хабенский кечаси уй чироғини ўчирмайди.