Rossiya Liberal-demokratik partiyasi yetakchisi Vladimir Jirinovskiy Turkiyaga yadroviy raketa zarbasi yo‘llashni taklif qildi. Siyosiy arbobning so‘zlaridan “Govorit Moskva” radiostansiyasi iqtibos keltirmoqda.
“Istanbulni yo‘q qilish juda oson: bo‘g‘ozga bitta yadroviy bomba tashlasa, shahar suv ostida qoladi. Shu darajada dahshatli toshqin bo‘ladi-ki, suv sathi 10—15 metrga ko‘tariladi va shahar yo‘q bo‘lib ketadi. Bu shaharda esa 9 million kishi yashaydi”, — dedi RLDP yetakchisi.
Jirinovskiyning so‘zlariga ko‘ra, Turkiyaning NATO bo‘yicha hamkorlari “yadroviy yong‘inda halok bo‘lishni istamay”, bu ishga qo‘shilmaydi. Partiya yetakchisining qayd etishicha, Turkiya hozirgi vaqtda Rossiyaning birinchi raqamli dushmani hisoblanadi.
Jirinovskiyning fikricha, hozirgi vaqtda Turkiyaning butun oliy rahbariyati, xususan, prezidenti, bosh vaziri va Bosh shtabi “quturish” holatida. “Ular nima bo‘lishini bilmaydi. Ularning o‘rnida bo‘lganimda, Turkiya beriladigan qaqshatqich zarbadan qo‘rqib o‘tirgan bo‘lardim. Prezidentning bitta ahmoqona harakati bilan mamlakat yo‘q bo‘lib ketishi mumkin”, — deya qo‘shimcha qildi Jirinovskiy.
Turkiya qiruvchi samolyotlari 24-noyabr kuni Rossiyaga tegishli Su-24 bombardimonchi samolyotini urib tushirganidan so‘ng, Rossiya va Turkiya o‘rtasidagi munosabatlar keskin sovuqlashdi. Turkiya tomonining ta’kidlashicha, Su-24 mamlakat havo kengliklarini buzib o‘tgani uchun, bir necha bor ogohlantirilganidan so‘ng urib tushirilgan. Rossiyaning ma’lum qilishicha, Turkiya samolyotlari Su-24 ga Suriya hududida hujum qilgan. Su-24 ning shturmani hech qanday ogohlantirish kelmaganini aytib o‘tdi.
Voqea: Turkiya urib tushirgan Su-24
Izoh (0)