Россия Либерал-демократик партияси етакчиси Владимир Жириновский Туркияга ядровий ракета зарбаси йўллашни таклиф қилди. Сиёсий арбобнинг сўзларидан «Говорит Москва» радиостанцияси иқтибос келтирмоқда.
«Истанбулни йўқ қилиш жуда осон: бўғозга битта ядровий бомба ташласа, шаҳар сув остида қолади. Шу даражада даҳшатли тошқин бўлади-ки, сув сатҳи 10—15 метрга кўтарилади ва шаҳар йўқ бўлиб кетади. Бу шаҳарда эса 9 миллион киши яшайди», — деди РЛДП етакчиси.
Жириновскийнинг сўзларига кўра, Туркиянинг НАТО бўйича ҳамкорлари «ядровий ёнғинда ҳалок бўлишни истамай», бу ишга қўшилмайди. Партия етакчисининг қайд этишича, Туркия ҳозирги вақтда Россиянинг биринчи рақамли душмани ҳисобланади.
Жириновскийнинг фикрича, ҳозирги вақтда Туркиянинг бутун олий раҳбарияти, хусусан, президенти, бош вазири ва Бош штаби «қутуриш» ҳолатида. «Улар нима бўлишини билмайди. Уларнинг ўрнида бўлганимда, Туркия бериладиган қақшатқич зарбадан қўрқиб ўтирган бўлардим. Президентнинг битта аҳмоқона ҳаракати билан мамлакат йўқ бўлиб кетиши мумкин», — дея қўшимча қилди Жириновский.
Туркия қирувчи самолётлари 24 ноябрь куни Россияга тегишли Су-24 бомбардимончи самолётини уриб туширганидан сўнг, Россия ва Туркия ўртасидаги муносабатлар кескин совуқлашди. Туркия томонининг таъкидлашича, Су-24 мамлакат ҳаво кенгликларини бузиб ўтгани учун, бир неча бор огоҳлантирилганидан сўнг уриб туширилган. Россиянинг маълум қилишича, Туркия самолётлари Су-24 га Сурия ҳудудида ҳужум қилган. Су-24 нинг штурмани ҳеч қандай огоҳлантириш келмаганини айтиб ўтди.
Воқеа: Туркия уриб туширган Су-24
Изоҳ (0)