Shotlandiyaning Glazgo shahrida politsiya zobitlari ko‘zi ojiz Jonatan Miller uyiga adashib bostirib kirdi. Miller uning salomatligiga ziyon yetgani, iti esa bezovta bo‘lib qolganini bildirib, zobitlar ustidan shikoyat qildi, deya xabar beradi The Daily Mirror.
“Politsiyachilar ishga ketishim bilan eshikni buzib, uyga bostirib kirgan. Ular uyda mening nomimga yozilgan maktubni topgach, adashganlarini anglagan. Ko‘chmas mulk bo‘yicha agentga qo‘ng‘iroq qilib, yanglishganlariga uzil-kesil ishonch hosil qilgan”, — deya hikoya qiladi Miller.
Erkak yangi uyga bir oy avval ko‘chib kelgandi. Zobitlar uy egasi to‘g‘risidagi yangilangan ma’lumotni tekshirib ko‘rmay, mazkur xonadonda politsiya qidirayotgan gumonlanuvchining qizi istiqomat etayotganini taxmin qilgan.
Millerning aytishicha, bosqin itini cho‘chitib yuborgan va uning do‘stona fe’l-atvori tajovuzkorona ko‘rinish olgan. Shotlandiyalikning o‘zi ko‘zidagi og‘riqlardan shikoyat qilib, shifokorga murojaat etgan va buni reyddan so‘ng stress holatida bo‘lgani bilan izohlagan.
Operatsiya chog‘ida singan mebel va buyumlarni yangilash Miller uchun 760 dollarga tushadi. Shotlandiya politsiyasi vakili xizmat tekshiruvi o‘tkazilishini ma’lum qildi.
Izoh (0)