Navbatdagi El-Klasiko arafasida mazkur qarama-qarshilik tarixidan xabardor bo‘lgani va ishqibozlar tomonidan lan’atlarga uchrashini aniq bilgani holda “Barselona”dan “Real Madrid”ga yoki “Real Madrid”dan “Barselona” o‘tgan futbolchilarni yodga olamiz.
“Real Madrid” — “Barselona” raqobati tarixida 11 marta futbolchilar u jamoadan bunisiga to‘g‘ridan to‘g‘ri yo‘l olgan. Quyida ana shunday o‘tishlarning eng shov-shuvlilarini tanlab oldik.5. Bernd Shuster — 1988-yili “Barselona”dan “Real Madrid”ga o‘tgan
Barselonaga 21 yoshida Germaniyaning eng mashhur futbolchilaridan biri sifatida tashrif buyurgan futbolchi birinchi mavsumidanoq Ispaniya grandi yetakchisiga aylandi. Biroq o‘zining tushunib bo‘lmas xulqi sabab, jamoadagi obro‘siga putur yetkazdi, ishqibozlar va rahbariyat bilan janjallashib, “Real Madrid”ga o‘tib ketdi.
4. Luis Enrike — 1996-yili “Real Madrid”dan “Barselona”ga o‘tgan
1991—1996-yillar davomida “Real Madrid” safida to‘p surgan Luis Enrike, 2004-yilgacha “Barselona” sharafini himoya qildi. U “Madrid”dan kelib, “Barselona” ishqibozlarining suyuklisiga aylana va jamoa sardori bo‘la olgan ikki futbolchidan biri hisoblanadi.
3. Mixael Laudrup — 1994 yili “Barselona”dan “Real Madrid”ga o‘tgan
Daniyalik futbolchi “Barselona”dagi besh yil davomida to‘rt marta Ispaniya chempioni, ikki mrata Superkubok sohibi, bir martadan Yevropa Chempionlar Ligasi va Yevropa Superkubogini qo‘lga kiritdi. U jamoa yetakchisi edi, biroq Yoxan Kroyf “Barsa” bosh murabbiyi etib tayinlanganidan so‘ng, u asosiy tarkibdagi o‘rnini jamoaning bo‘lajak bosh murabbiyi Xosep Gvardiolaga boy bera boshladi.
2. Xosep Samityer — 1932-yili “Barselona”dan “Real Madrid”ga o‘tgan
“Barselona” maktabi tarbiyalanuvchisi hisoblangan Samityer El-Klasiko tarixidagi ilk “sotqin” hisoblanadi. 10 yoshidan kataloniyaliklar ishqibozi bo‘lgan futbolchi jamoa tarkibida 458 ta o‘yin o‘tkazib, 319 ta gol urgandi. Futbolchi va klub rahbariyati o‘rtasida kelishmovchiliklar 1929-yili boshlanadi — rahbariyat uni “yulduzlik kasali”ga chalinganlikda ayblaydi.
1932-yili “Barselona” bilan shartnomasi tugaganidan so‘ng, rahbariyat unga maoshi kamaytirilgan yangi bitim taklif qildi. Biroq Samityer buni rad etib, vaziyatga aralashgan “Real Madrid”ga o‘tib ketdi. Bundan larzaga tushgan “Barselona” ishqibozlari Samityerning ismini klub tarixidan o‘chirib tashlashga qaror qilgan. Biroq, faoliyati yakunlanganidan keyin Barselonaga qaytgan Xosep, La Diagonal maydonida avtomobillar harakatini to‘xtatib, “xiyonati uchun” tiz cho‘kib kechirim so‘raydi.1. Luish Figu — 2000-yili “Barselona”dan “Real Madrid”ga o‘tgan
1995-yili 2,5 million dollar evaziga Portugaliyaning “Sporting” jamoasidan sotib olingan Luish Figu darhol jamoa yetakchisiga aylandi, muxlislar uni ardoqlashardi. 2000-yili uning “Real Madrid”ga o‘tishi haqida mish-mishlar tarqaganida, u maxsus matbuot anjumani uyushtirib, dushman jamoa o‘yinchisiga aylanmoqchi emasligini bildirgandi. “Keyin ko‘zingiz qanday qarayman?”, — degandi Figu.
Biroq, shu so‘zni aytganidan bir kun o‘tib u “Real Madrid”da tibbiy ko‘rikdan muvaffaqiyatli o‘tdi va “dushman jamoa” bilan shartnoma tuzdi. “Barselona” o‘z yetakchilaridan birini saqlab qolish uchun hech narsa qila olmadi — “Real” o‘shanda talab qilingan — 56,1 million dollarni “Barselona”ga qurtday sanab bergandi.
Eslatib o‘tamiz, Toshkent vaqti bilan 21-noyabr, shanba kuni soat 22:15 da Madriddagi “Santyago Bernabeu” stadionida “Real Madrid” — “Barselona” uchrashuvi boshlanadi.
Izoh (0)