Qirg‘izistonda terrorchilar qochib ketgan 50-tergov izolyatorining sobiq boshlig‘i, polkovnik Imonqul Teltayev o‘zini osib qo‘ydi. Bu haqda respublika jazoni ijro etish davlat muassasasi matbuot xizmati vakili ma’lum qildi, deya xabar beradi “Nur.kz”.
“Bugun (20-noyabr) tongda 1-tergov izolyatorining tibbiy-sanitariya qismi palatasida 50-tergov izolyatorining sobiq boshlig‘i Imonqul Teltayev o‘zini osib qo‘ydi. U izolyatorga keltirilgach sog‘ligidan shikoyat qilgan va tibbiy-sanitariya qismiga joylashtirilgandi. Teltayev palatada bir o‘zi bo‘lgan”, — deya ta’kidlagan matbuot xizmati vakili.
Eslatib o‘tamiz, 12-oktabr kuni Qirg‘izistondagi 50-tergov izolyatoridan mamlakatda taqiqlangan “Jayshul Mahdiy” tashkilotining to‘qqiz nafar a’zosi qochib ketgan. Qochishga urinish va 10 kun davom etgan qidiruv operatsiya davomida jami 13 kishi — olti nafar terrorchi va yetti nafar tinch aholi hamda huquq-tartibot idoralari vakillari halok bo‘lgan. Uch nafar terrorchi ozodlikda qolmoqda.
Imonqul Teltayev mazkur hodisadan so‘ng lavozimidan bo‘shatilgan va 11-noyabrda “Xizmat vazifasiga sovuqqonlik bilan qarash” moddasi bo‘yicha ochilgan jinoiy ish doirasida hibsga olingandi.
Izoh (0)