Toshkentda 10-noyabrdan ijaradagi xonadonlarda yashayotganlarning shaxsiga aniqlik kiritish bo‘yicha keng qamrovli ishlar boshlandi

Toshkent shahrida 2015-yilning 10-noyabridan boshlab maxsus tuzilgan Ishchi guruhlar turar va noturar joylarni xatlovdan o‘tkazish bo‘yicha keng qamrovli o‘rganish ishlariga kirishadi. Bu haqda Toshkent shahar hokimligida bugun bo‘lib o‘tgan brifingda e’lon qilindi.

O‘rganish ishlarini olib boradigan Ishchi guruhlar tarkibidan tuman hokimliklari, Ichki ishlar boshqarmasi, Yer resurslari va davlat kadastri boshqarmasi, Binolardan foydalanish departamenti, Davlat raqobat qo‘mitasi Toshkent shahar hududiy boshqarmasi, Davlat sanitariya-epidemiologiya nazorati markazi, “Mahalla” xayriya jamoat fondi, Toshkent shahar Xususiy uy-joy mulkdorlari shirkatlari uyushmasi vakillari o‘rin oladi.

Qayd etishlaricha, Ishchi guruh fuqarolarning o‘zini o‘zi boshqarish organlari, xususiy uy-joy mulkdorlari shirkatlari, kommunal xizmatlar ko‘rsatuvchi korxonalar hamda manfaatdor yuridik va jismoniy shaxslar axborotlari asosida o‘rganish ishlarini olib boradi.

Ishchi guruhlariga egasiz turar joylarining paydo bo‘lishi sabablarini aniqlash, bo‘sh turgan va ijaradagi xonadonlarni aniqlab, ro‘yxatini tuzish, egasi aniqlanmagan xonadonlar bo‘yicha qonuniy choralar ko‘rish, ijaradagi xonadonlarda yashovchilarning shaxsiga aniqlik kiritib, ro‘yxatini yuritish, yangi qurilgan va qurilayotgan turar va noturar joy obyektlarini o‘rganib, u yerdagi ishlovchilarning shaxsiga aniqlik kiritish ishlari yuklatilmoqda.

Bundan tashqari, shahar hokimining 26-oktabrdagi “Toshkent shahrida jamoat tartibini saqlash, xavfsizlikni ta’minlash va fuqarolarning pasport tizimi qoidalariga rioya etishi ustidan nazoratni yanada kuchaytirish to‘g‘risida”gi qaroriga muvofiq, tuman ichki ishlar bo‘limlarida “Obyektni ijaraga beruvchi shaxslar” va “Obyektni ijaraga oluvchi shaxslar” elektron bazalari yaratilmoqda.

“Bu Toshkentda bugungi kunda amalda qancha odam istiqomat qilayotganini aniqlash bilan birga, ijaraga beruvchi fuqarolarning soliq va kommunal xizmat ko‘rsatuvchi tashkilotlar oldidagi mas’uliyatini oshiradi va, o‘z navbatida, ko‘rsatilayotgan kommunal xizmatlar hajmi va ular bo‘yicha to‘lovlar o‘rtasida vujudga kelayotgan tafovutlarni bartaraf etishga xizmat qiladi”, — deyiladi hokimlik bayonotida.