Тошкентда 10 ноябрдан ижарадаги хонадонларда яшаётганларнинг шахсига аниқлик киритиш бўйича кенг қамровли ишлар бошланди

Тошкент шаҳрида 2015 йилнинг 10 ноябридан бошлаб махсус тузилган Ишчи гуруҳлар турар ва нотурар жойларни хатловдан ўтказиш бўйича кенг қамровли ўрганиш ишларига киришади. Бу ҳақда Тошкент шаҳар ҳокимлигида бугун бўлиб ўтган брифингда эълон қилинди.

Ўрганиш ишларини олиб борадиган Ишчи гуруҳлар таркибидан туман ҳокимликлари, Ички ишлар бошқармаси, Ер ресурслари ва давлат кадастри бошқармаси, Бинолардан фойдаланиш департаменти, Давлат рақобат қўмитаси Тошкент шаҳар ҳудудий бошқармаси, Давлат санитария-эпидемиология назорати маркази, «Маҳалла» хайрия жамоат фонди, Тошкент шаҳар Хусусий уй-жой мулкдорлари ширкатлари уюшмаси вакиллари ўрин олади.

Қайд этишларича, Ишчи гуруҳ фуқароларнинг ўзини ўзи бошқариш органлари, хусусий уй-жой мулкдорлари ширкатлари, коммунал хизматлар кўрсатувчи корхоналар ҳамда манфаатдор юридик ва жисмоний шахслар ахборотлари асосида ўрганиш ишларини олиб боради.

Ишчи гуруҳларига эгасиз турар жойларининг пайдо бўлиши сабабларини аниқлаш, бўш турган ва ижарадаги хонадонларни аниқлаб, рўйхатини тузиш, эгаси аниқланмаган хонадонлар бўйича қонуний чоралар кўриш, ижарадаги хонадонларда яшовчиларнинг шахсига аниқлик киритиб, рўйхатини юритиш, янги қурилган ва қурилаётган турар ва нотурар жой объектларини ўрганиб, у ердаги ишловчиларнинг шахсига аниқлик киритиш ишлари юклатилмоқда.

Бундан ташқари, шаҳар ҳокимининг 26 октябрдаги «Тошкент шаҳрида жамоат тартибини сақлаш, хавфсизликни таъминлаш ва фуқароларнинг паспорт тизими қоидаларига риоя этиши устидан назоратни янада кучайтириш тўғрисида»ги қарорига мувофиқ, туман ички ишлар бўлимларида «Объектни ижарага берувчи шахслар» ва «Объектни ижарага олувчи шахслар» электрон базалари яратилмоқда.

«Бу Тошкентда бугунги кунда амалда қанча одам истиқомат қилаётганини аниқлаш билан бирга, ижарага берувчи фуқароларнинг солиқ ва коммунал хизмат кўрсатувчи ташкилотлар олдидаги масъулиятини оширади ва, ўз навбатида, кўрсатилаётган коммунал хизматлар ҳажми ва улар бўйича тўловлар ўртасида вужудга келаётган тафовутларни бартараф этишга хизмат қилади», — дейилади ҳокимлик баёнотида.