XVJ Fors ko‘rfazi davlatlari yil davomida 275 mlrd dollar yo‘qotishini taxmin qildi

2015-yilda Fors ko‘rfazi mamlakatlari budjeti neft narxi tushib ketganligi oqibatida 275 milliard dollar yo‘qotadi. Bu haqda Xalqaro valyuta jamg‘armasi (XVJ) rahbari Kristin Lagard Fors ko‘rfazi arab davlatlari hamkorligi kengashining Qatarda bo‘lib o‘tgan yig‘ilishidagi chiqishi chog‘ida ma’lum qildi, deya xabar beradi The Economic Times.

Lagard jamg‘arma bashoratlariga ko‘ra mazkur mamlakatlar yalpi ichki mahsuloti bu yil 3,2 foizgacha pasayishi, kelgusi yilda esa 2,7 foizgacha tushib ketishini ham aytib o‘tdi. “Biz neft narxi hozirgi darajada bir necha yil davomida o‘zgarishsiz qolishini kutmoqdamiz, — deya ta’kidlagan XVJ rahbari. — Shu munosabat bilan Fors ko‘rfazi davlatlari o‘z budjetlariga tegishli o‘zgartirishlar kiritishi lozim”.

Eslatib o‘tamiz, Fors ko‘rfazi davlatlari sirasiga dunyo neft bozorining yirik ishtirokchilari — Bahrayn, Kuvayt, Ummon, Saudiya Arabistoni, Qatar va Birlashgan Arab Amirliklari kiradi.