Тожикистонлик таксичи йигит москвалик қизга ҳамёнини қайтариб бериши сабабини маълум қилди

Бир ҳафта аввал Москвада дўконда ўзи топиб олган ҳамённи эгасига қайтариб берган тожикистонлик таксичи Забеҳулло Шафеъзодани телекўрсатувларга чақиришмоқда, унга дунёнинг турли бурчакларидан қўнғироқ қилиб, миннатдорлик билдиришмоқда, деб ёзади Sputnik.

Нашрнинг «Нима учун ҳамён эгасини қатъият билан қидирдингиз?» — деган саволига жавобан, Забеҳулло шундай деди: «Мен шундай тарбияланганман ва бировнинг нарсаси яхшилик келтирмайди, деб биламан. Агар ҳамённи қайтиб бермаганимда, ташвиш ичида қолардим. Бундан ташқари, ҳамён ичида бўлган карталарнинг барчасини қайта тиклаш учун унинг эгаси анча вақт сарфлаган бўларди».

Йигит у билан боғлиқ воқеа ижтимоий тармоқларда тарқалиб кетгач, мобил телефонига пуллар туша бошлаганини, уларнинг барчасини йиғиб, ҳамён эгаси — Алёна Куратованинг хаста болаларга кўмак берувчи жамғармасига кўчириб ўтказганини таъкидлади. Пулни ечиш вақтида унинг миқдори 7550 рублни ташкил этган.

Забеҳулло Алёна унга қўнғироқ қилиб, телекўрсатувда суратга тушишга таклиф қилганини, 7 ноябрь, шанба куни съёмка жараёни бошланишини айтди. Шунингдек, унинг сўзларига кўра, АҚШ, Ирландия ва дунёнинг бошқа мамлакатларидан қўнғироқ қилишиб, ушбу хатти-ҳаракати учун раҳматлар айтишмоқда. Ҳатто, Тожикистон элчихонасидан ҳам миннатдорлик билдириш мақсадида у билан боғланишган.

Келгусидаги режалари ҳақида гапирар экан, Забеҳулло ҳозирча таксичилик қилишда давом этишини, кейинчалик яна ўйлаб кўришини таъкидлади.

Эслатиб ўтамиз, Тожикистоннинг Панжикент шаҳри яқинидаги Маргедар қишлоғидан бўлган Забеҳулло Шафеъзода қизнинг ҳамёнини дўкондан топиб олган. У билан боғланиш мумкин бўлган маълумотларни топа олмаган йигит қизнинг карточкасига кичкина суммадаги пул ўтказмалари билан бирга қисқа хабар ҳам юбора бошлайди. Бу ҳақдаги маълумот Алёнанинг мобил телефонига SMS-хабар шаклида боради.

Шундан сўнг, ҳамён эгаси унга қўнғироқ қилган. Шафеъзода ҳамённи қизнинг уйига олиб бориб берган.

Ижтимоий тармоқ фойдаланувчилари нафақат унинг ҳалоллиги, балки топқирлигига ҳам тан берди. Улар Забеҳуллонинг бу ишини жавобсиз қолдирмасликка қарор қилди. Алёнанинг интернетдаги постида қолган карточка маълумотлари бўйича улар тожикистонлик йигитга кичик пул ўтказмаларини юборди.