Gretsiyaning Xalkidiki shahrida davom etayotgan shaxmat bo‘yicha 8 yoshdan 18 yoshgacha bo‘lgan sportchilar o‘rtasidagi jahon chempionatida 9-tur partiyalari ortda qoldi. Musobaqa shveysarcha tizimda o‘tkazilayotgan bo‘lib, g‘olib va sovrindorlar 11ta tur yakuniga ko‘ra aniqlanadi, deb xabar qiladi “Olamsport”.
5-noyabrga qadar davom etadigan jahon chempionatida 122 davlatdan 1600 nafardan ziyod shaxmatchi ishtirok etyapti. Ushbu jahon chempionatida O‘zbekiston sharafini Mamatqul Haylayev va grossmeyster Marat Jumayev murabbiyligidagi 15 nafar yosh shaxmatchi himoya qilyapti.
Afsuski, ushbu turda O‘zbekistonning yetakchi shaxmatchilari Bahora Abdusattorova va Nodirbek Abdusattorovlar kutilmaganda raqiblariga imkoniyatni boy berib qo‘ydi. 12 yoshlilar guruhida o‘z imkoniyatini sinovdan o‘tkazayotgan Nodirbek kutilmaganda oq donalarda o‘ynashiga qaramay, reytingda o‘zidan ancha pastda borayotgan hindistonlik Sarin Nixalga yutqazib qo‘ydi. Ushbu mag‘lubiyatdan so‘ng Nodirbek turnir jadvalida 7 ochko bilan birinchi pog‘onadan 4-o‘ringa tushib ketdi.
16 yoshlilar turnirida qatnashayotgan Bahora Abdusattorova esa qora donalarda gretsiyalik Anastasiya Avramidouga imkoniyatni boy berdi. Ushbu mag‘lubiyat Bahorani turnir jadvalida 3-pog‘onadan 9-o‘ringa tushirib yubordi.
10 yoshgacha bo‘lgan shaxmatchilar guruhida qatnashayotgan Javohir Sindorov bu turda qora donalarda o‘ynashiga qaramay, germaniyalik Yakob Veyxrauxni mag‘lubiyatga uchratdi. Uning ukasi Islombek Sindorov esa oq donalarda hindistonlik Dey Shaxildan ustun keldi.
Izoh (0)