Shaxmat bo‘yicha 8 yoshdan 18 yoshgacha bo‘lgan sportchilar o‘rtasidagi jahon chempionatining 8-tur partiyalari ortda qoldi. “Olamsport” xabariga ko‘ra, Gretsiyaning Xalkidiki shahrida davom etayotgan musobaqa g‘olib va sovrindorlari 11 tur yakuniga ko‘ra aniqlanadi.
5-noyabrga qadar davom etadigan jahon chempionatida 122 davlatdan 1,6 mingdan ziyod shaxmatchilar ishtirok etyapti. Ushbu jahon chempionatida O‘zbekiston sharafini Mamatqul Haylayev va grossmeyster Marat Jumayev murabbiyligidagi 15 nafar yosh shaxmatchi himoya qilyapti.
Shu kungacha mag‘lubiyatsiz odimlagan Bahora Abdusattorova oq donalarda o‘ynashiga qaramay, o‘zi singari 6 ochkoga ega bo‘lib turgan germaniyalik Fiona Siyeberga kutilmaganda imkoniyatni boy berdi. Mazkur mag‘lubiyatdan so‘ng Bahora peshqadamlikdan 3-o‘ringa tushib qoldi.
12 yoshlilar guruhida o‘z imkoniyatini sinovdan o‘tkazayotgan Nodirbek Abdusattorov esa 8-turda durang natija qayd etdi. Qora donalarda harakat qilgan Nodirbek amerikalik Endryu Xong bilan murosaga keldi. Nodirbek 7 ochko bilan hamon o‘z yosh guruhida birinchi o‘rinni egallab turibdi.
10 yoshgacha bo‘lgan shaxmatchilar guruhida qatnashayotgan Javohir Sindarov yakuniga yetgan turda oq donalarda germaniyalik Richard Betkeni mag‘lubiyatga uchratdi. Uning ukasi Islombek Sindarov esa, aksincha, qora donalarda o‘ynab, hindistonlik Subramaniyam Bharatga yutqazib qo‘ydi.
Shunday qilib, Islombek qo‘shimcha ko‘rsatkichlarga ko‘ra, turnir jadvalida 4-o‘rindan 8-pog‘onaga tushib ketdi.
Izoh (0)