Грециянинг Халкидики шаҳрида давом этаётган шахмат бўйича 8 ёшдан 18 ёшгача бўлган спортчилар ўртасидаги жаҳон чемпионатида 9-тур партиялари ортда қолди. Мусобақа швейцарча тизимда ўтказилаётган бўлиб, ғолиб ва совриндорлар 11та тур якунига кўра аниқланади, деб хабар қилади «Оламспорт».
5 ноябрга қадар давом этадиган жаҳон чемпионатида 122 давлатдан 1600 нафардан зиёд шахматчи иштирок этяпти. Ушбу жаҳон чемпионатида Ўзбекистон шарафини Маматқул Ҳайлаев ва гроссмейстер Марат Жумаев мураббийлигидаги 15 нафар ёш шахматчи ҳимоя қиляпти.
Афсуски, ушбу турда Ўзбекистоннинг етакчи шахматчилари Баҳора Абдусатторова ва Нодирбек Абдусатторовлар кутилмаганда рақибларига имкониятни бой бериб қўйди. 12 ёшлилар гуруҳида ўз имкониятини синовдан ўтказаётган Нодирбек кутилмаганда оқ доналарда ўйнашига қарамай, рейтингда ўзидан анча пастда бораётган ҳиндистонлик Сарин Нихалга ютқазиб қўйди. Ушбу мағлубиятдан сўнг Нодирбек турнир жадвалида 7 очко билан биринчи поғонадан 4-ўринга тушиб кетди.
16 ёшлилар турнирида қатнашаётган Баҳора Абдусатторова эса қора доналарда грециялик Анастасия Аврамидоуга имкониятни бой берди. Ушбу мағлубият Баҳорани турнир жадвалида 3-поғонадан 9-ўринга тушириб юборди.
10 ёшгача бўлган шахматчилар гуруҳида қатнашаётган Жавоҳир Синдоров бу турда қора доналарда ўйнашига қарамай, германиялик Якоб Вейхраухни мағлубиятга учратди. Унинг укаси Исломбек Синдоров эса оқ доналарда ҳиндистонлик Дей Шахилдан устун келди.
Изоҳ (0)