Sport gimnastikasi bo‘yicha O‘zbekiston sharafini himoya qiluvchi Oksana Chusovitina Glazgoda o‘tgan 2015-yilgi jahon chempionatidagi ishtirokidan qoniqish hosil qildi. “TASS” xabariga ko‘ra, Chusovitina mazkur musobaqada o‘z orzusi — faoliyatidagi yettinchi Olimpiya o‘yinlarida qatnashish uchun muhim qadam tashladi.
Chusovitina Glazgodagi musobaqa saralash bosqichida ko‘pkurashda 52-o‘rinni egalladi va final bosqichiga chiqa olmadi. O‘zbekistonlik sportchining eng kuchli jihati hisoblangan tayanib sakrash musobaqalarida ham Chusovitina 30-o‘rinni egallab, final yo‘llanmasidan mahrum bo‘ldi.
“Musobaqada yomon ishtirok etmadim, deb hisoblayman. Muhimi, Olimpiada arafasidagi haftalikda qatnashish huquqini qo‘lga kiritdim va o‘z orzuim — faoliyatimdagi yettinchi Olimpiadada ishtirok etishga yaqin keldim. Glazgoda faqat ko‘pkurash bo‘yicha olimpiya yo‘llanmalari o‘ynaldi. Men ko‘pdan beri barcha to‘rt snaryadda qatnashayotganim yo‘q, shu sababli ham qandaydir jiddiy sovringa da’vogarlik qilishim mumkin emasdi”, — dedi Chusovitina.
Olimpiada arafasidagi haftalik 16—24-aprel kunlari Rio-de-Janeyroda bo‘lib o‘tadi. Unda Olimpiada—2016 da qatnashish huquqini qo‘lga kiritgan to‘rttadan erkaklar va ayollar jamoalari nomi ma’lum bo‘ladi. Shuningdek, yakkalik bahslarida qatnashadigan sportchilar orasida ham qo‘shimcha saralash o‘tkaziladi.
40 yoshli Chusovitina oltita Olimpiadada qatnashgan tarixdagi yagona gimnastikachidir. Chusovitina 1992-yili Birlashgan (sobiq SSSR mamlakatlari sportchilaridan tuzilgan) jamoa tarkibida Barselona olimpiadasida oltin, 2008-yili esa Germaniya terma jamoasi tarkibida kumush medallarni qo‘lga kiritgan, qolgan yillarda u O‘zbekiston sharafini himoya qilgan. U uch karra jahon chempioni ham hisoblanadi.
Izoh (0)