“Antalyaspor” va “Beshiktosh” jamoalari o‘rtasidagi futbol bo‘yicha Turkiya chempionati uchrashuvi bilan faqat quyosh batareyalari yordamida ishlaydigan jahondagi ilk stadion ochilishi bo‘lib o‘tdi. Bu haqda “Sports.ru” xabar bermoqda.
O‘rtayer dengizi sohilidagi kurort shaharda faqat futbol uchrashuvlarini o‘tkazish uchun mo‘ljallangan “Antalya Arena” stadionini qurish ishlari 2013-yil yozida boshlangan edi. Stadion elektr ta’minoti to‘liq quyosh nuri hisobidan amalga oshiriladi. Quyosh batareyalari stadionning tomiga o‘rnatilgan bo‘lib, har bir batareya 7200 kilovatt energiya ishlab chiqaradi.
33 ming tomoshabinga mo‘ljallangan stadion o‘zining ko‘rinishi bilan ham e’tiborga molik — to‘g‘ri to‘rtburchak futbol maydoni to‘liq oval inshootning ichida joylashgan. Markaziy tribunalar uch qavatli. Stadion shunday loyihalashtirilganki, uning balkonlaridan turib, O‘rtayer dengizi manzaralarini tomosha qilish mumkin.
https://www.youtube.com/watch?v=kXBN3W6Oe_g
Stadion qariyb 35 million dollarga qurilgan. “Antalya Arena” ayni vaqtda kamerunlik 34 yoshli hujumchi Samuel Eto’O to‘p surayotgan mahalliy “Antalyaspor” futbol jamoasi uchun uy stadioni vazifasini bajaradi.
Izoh (0)