Buyuk Britaniyaning La-Mansh sohilida, sayyohlar orasida mashhur bo‘lgan Chesil Bich kurortidan 300 metrga yetmagan uzoqlikdagi qirg‘oqda baliqchining to‘riga ikki metrli akula ilindi. Bu haqda The Independent ma’lumotlariga tayanib, Interfax xabar bermoqda.
Baliqchining aytishicha, 23 yillik faoliyati davomida qirg‘oqqa bunchalik yaqin masofada akulalarni uchratmagan. Uzunligi uch metrdan oshiqroqni tashkil etishi mumkin bo‘lgan seld akulalari bu joylarda plyajdan kamida 15 kilometr uzoqlikda kuzatilgan. Shunisi ham borki, baliq to‘rga tushgan payt o‘lik holda bo‘lgan.
Garchi seld akulalari inson uchun xavfli sanalsa-da, odamlar yoki qayiqlarga kamdan-kam tashlanadi. Ularni noqonuniy tutish man etilgan. Xalqaro tabiatni muhofaza etish uyushmasi bu turga qo‘riqlanuvchi maqomini berganligi, ularni tutish cheklanganligi sababli mazkur akulalarning kamayish sur’ati tobora pasayib bormoqda.
Izoh (0)