Epitsentri Afg‘onistonda bo‘lgan yer silkinishi natijasida Pokistonda kamida 13 kishi halok bo‘ldi, deb xabar beradi “RIA Novosti”.
Xayber-Paxtunxva provinsiyasidagi Svat okrugida 6 kishi halok bo‘ldi, jumladan, bolalar ham. Bajaur tumanida bino qulashi oqibatida to‘rt kishi vafot etdi. Panjob provinsiyasidagi Kallar Kaxarda yosh bola halok bo‘lgan. Kasur va Sargodxda ham bir nafardan kishi qurbon bo‘lgan.
Svat tumanidagi shifoxonaga 194 kishi kelib tushgan, Peshovorda 100 dan ortiq odam kasalxonaga yotqizilgan.
Hindikush tog‘larida 26-oktabr, dushanba kuni Afg‘oniston vaqti bilan 14:09 da 7,5 magnitudali zilzila yuz berdi. Zilzila o‘chog‘i Jarm shahridan 45 kilometr janubi-g‘arbda va 212,5 kilometr chuqurlikda joylashgan.
Yerosti silkinishlari Pokiston, Hindiston, Qirg‘iziston, Tojikiston, Ozarbayjon, Qozog‘iston va O‘zbekistonda sezildi.
“Toshkent” markaziy seysmik stansiyasi bergan ma’lumotga ko‘ra, zilzila kuchi Termizda 5,5, Toshkent va Samarqandda 5, Farg‘onada 4, Andijon va Namanganda 3 magnitudani tashkil etgan.
Izoh (0)