Yevropa umumiy yurisdiksiya sudi Ukraina mamlakatning sobiq prezidenti Viktor Yanukovichning, unga nisbatan joriy etilgan sanksiyalarni bekor qilish ishi bo‘yicha yuridik xarajatlarini qoplab berishi kerakligi haqida qaror chiqardi. Bu haqda, “RBK” xabariga ko‘ra, sobiq prezident oilasi manfaatlarini himoya qilayotgan Britaniyadagi Joseph Hage Aaronson advokatlik kompaniyasi matbuot xizmati ma’lum qildi.
Yanukovich 2014-yil mayidan beri o‘ziga nisbatan amalda bo‘lgan sanksiyalar ustidan shikoyat qilib, sudga murojaat qilgan. Keyinroq Ukraina sud jarayoniga qo‘shilish uchun Yevropa umumiy yurisdiksiya sudidan ruxsat so‘ragan, biroq 2014-yil dekabrida mazkur iltimosnoma qaytarib olingan.
2015-yil martida esa Yanukovich, sud ishiga Ukrainaning qo‘shilishga harakat qilgani bilan bog‘liq yuzaga kelgan xarajatlarni qoplab berishni so‘rab, sudga murojaat qilgan, sud sobiq prezidentning bu iltimosnomasini qondirdi.
Avvalroq Inson huquqlari bo‘yicha Yevropa sudi Ukraina sobiq prezidenti Viktor Yanukovichning amaldagi Ukraina hukumatiga qarshi da’vosini ro‘yxatga olgani ma’lum bo‘lgandi.
Izoh (0)