Rossiya Davlat dumasi Injil, Qur’on, Tanax va Ganjur matnlarini ekstremistik deb tan olishni taqiqlash haqidagi prezident tomonidan kiritilgan qonun loyihasini birinchi o‘qishda ma’qulladi. Hujjatga ko‘ra, Injil, Qur’on, Tanax va Ganjur, ularning mazmuni va ulardan keltirilgan iqtiboslar ekstremistik materiallar deb tan olishini mumkin emas.
Checheniston rahbari Ramzan Qodirov qonun loyihasi qabul qilingan kunni tarixiy sana deb atab, Rossiya prezidenti Vladimir Putinga alohida minnatdorchilik bildirdi. Bu haqda uning o‘zi Livejournal’dagi sahifasida yozib qoldirgan.
“Vatanimizning barcha musulmonlari bu qonun uchun Putindan cheksiz minnatdor. Ishonchim komil, mazkur qonun Rasululloh (s.a.v.) ummatining barcha vakillari qalbiga quvonch olib kiradi”, — dedi Ramzan Qodirov.
“Allohning irodasi bilan bu kunda Ibrohim payg‘ambar olovdan qutqarib qolingan, Nuh kemasi o‘ziga bandargoh topgan, Ayyub payg‘ambar og‘ir darddan xalos bo‘lgan, Muso payg‘ambar va uning xalqi fir’avndan qutqarib qolingan. Xuddi shu kunda Rossiyaning munosib prezidenti Vladimir Putin e’tiqodsiz va vatanfurush kimsalarning tahdidlariga qarshi qat’iy Qur’on himoyasiga turdi”, — dedi Checheniston rahbari.
“Vladimir Vladimirovich sharofati bilan mamlakatimizda teng huquqlilik bor, hech kim diniy qarashlari sabab ta’qib qilinmayapti. Bugundan boshlab men milliy yetakchimiz Vladimir Putinga ming karra kuchliroq sodiq bo‘laman va har qanday murakkablikdagi buyruqlarini kiprik qoqmay bajaraman!”, — deya qayd etdi Checheniston rahbari Ramzan Qodirov.
Rossiyada ilohiy kitoblarni himoya qilish haqidagi qonunga ehtiyoj 9-sentabrdan so‘ng, Yujno-Saxalinsk sudi sudyasi Natalya Perchenko prokuror Tatyana Belobrovetsning da’vosiga ko‘ra matnida Qur’ondan iqtiboslar keltirilgan kitobni ekstremistik deb topganidan so‘ng tug‘ilgandi.
Izoh (0)