O‘zbekistonda sayyohlik kompaniyalarining mehmonxonalar bilan hamkorlik qilishi uchun mo‘ljallangan yangi onlayn platforma ishga tushdi. Bu haqda UzDaily xabar bermoqda.
“O‘zbekturizm” xabariga ko‘ra, mazkur tizim sayyohlik va mehmonxona biznesidagi yirik mutaxassislar ko‘magida to‘liq mahalliy dasturchilar tomonidan ishlab chiqilgan.
Dasturchilar bitta to‘liq onlayn rejimga ko‘chirilgan platformada 100 ga yaqin mehmonxona va o‘nlab sayyohlik operatorlarini birlashtirish, o‘zaro munosabatlar jarayonini imkon qadar soddalashtirishning uddasidan chiqdi.
Ushbu tizim turoperatorga “yagona oyna” orqali sanoqli daqiqalarda mehmonxonalardagi bo‘sh xonalarni izlab topish va bir lahzada tasdiq javobini olib, ularni bron qilish imkonini beradi.
Bundan tashqari, sayyohlik kompaniyalariga aeroportda kutib olish va kuzatish, CIP-zal va Green Hall xizmatlarini oldindan buyurtma qilish, shuningdek, O‘zbekistonda ilk bor chet ellik sayyohlar uchun elektron sug‘urta polislari ko‘chirmalarini chiqarish xizmatlari yo‘lga qo‘yilgan.
Platformaning mahalliy kompaniyalar ehtiyojlari uchun to‘liq moslashtirilgani, hisob-kitoblar faqat pul o‘tkazish yo‘li bilan hamda milliy valyutada amalga oshirilishi uning asosiy ustunliklari hisoblanadi.
Izoh (0)