Krasnoyarsk o‘lkasi politsiyasi internet orqali odamlarga manfaatli shartlar asosida kredit berishni va’da qilib, Rossiyaning turli hududlarida istiqomat qilib keluvchi 200 dan ortiq kishining pulini undirib olgan, voyaga yetmagan retsidivist o‘quvchi qizni hibsga oldi. Bu haqda, hududiy Ichki ishlar vazirligi boshlig‘i keltirgan ma’lumotlarga asoslanib, “RIA Novosti” xabar bermoqda.
Politsiya ma’lumotlariga ko‘ra, o‘lkaning Nijneingash tumanida istiqomat qilib kelgan o‘quvchi qiz 2014-yil noyabr oyidan boshlab ijtimoiy tarmoqlardan biriga a’zo bo‘lib olib, o‘ylab topilgan ismlardan foydalangan holda manfaatli shartlar asosida kredit berilishi haqida e’lon berib kelgan.
“U ko‘rsatgan bank to‘lov kartasiga Rossiyaning turli hududlarida istiqomat qilib keluvchi 239 nafar fuqaroning har biri 1500 rubldan birlamchi to‘lovlarni amalga oshirgan. Shunday qilib, o‘zining g‘araz niyati bilan harakat qilgan qiz, firibgarlik yo‘li bilan 359 ming rubl miqdoridagi pul mablag‘larini qo‘lga kiritib, uni shaxsiy ehtiyojlari uchun sarflab yuborgan. Unga nisbatan ‘Firibgarlik’ moddasi bo‘yicha jinoyat ishi qo‘zg‘atildi”, – deyilmoqda tarqatilgan xabarda.
Ichki ishlar vazirligining ta’kidlashicha, qiz bundan oldin besh marotaba jinoiy javobgarlikka tortilgan bo‘lib, uning oilasi politsiyada ro‘yxatda turadi.
Izoh (0)