Красноярск ўлкаси полицияси интернет орқали одамларга манфаатли шартлар асосида кредит беришни ваъда қилиб, Россиянинг турли ҳудудларида истиқомат қилиб келувчи 200 дан ортиқ кишининг пулини ундириб олган, вояга етмаган рецидивист ўқувчи қизни ҳибсга олди. Бу ҳақда, ҳудудий Ички ишлар вазирлиги бошлиғи келтирган маълумотларга асосланиб, «РИА Новости» хабар бермоқда.
Полиция маълумотларига кўра, ўлканинг Нижнеингаш туманида истиқомат қилиб келган ўқувчи қиз 2014 йил ноябрь ойидан бошлаб ижтимоий тармоқлардан бирига аъзо бўлиб олиб, ўйлаб топилган исмлардан фойдаланган ҳолда манфаатли шартлар асосида кредит берилиши ҳақида эълон бериб келган.
«У кўрсатган банк тўлов картасига Россиянинг турли ҳудудларида истиқомат қилиб келувчи 239 нафар фуқаронинг ҳар бири 1500 рублдан бирламчи тўловларни амалга оширган. Шундай қилиб, ўзининг ғараз нияти билан ҳаракат қилган қиз, фирибгарлик йўли билан 359 минг рубль миқдоридаги пул маблағларини қўлга киритиб, уни шахсий эҳтиёжлари учун сарфлаб юборган. Унга нисбатан ‘Фирибгарлик’ моддаси бўйича жиноят иши қўзғатилди», – дейилмоқда тарқатилган хабарда.
Ички ишлар вазирлигининг таъкидлашича, қиз бундан олдин беш маротаба жиноий жавобгарликка тортилган бўлиб, унинг оиласи полицияда рўйхатда туради.
Изоҳ (0)