Jurnalist Stiven Glass, bir necha Amerika nashrlari uchun tayyorlab bergan maqolalarni soxtalashtirganligi uchun Harper’s Magazine jurnaliga chop etilgan maqolalar gonorarini qaytarib berdi. Glass nashrga 10 ming dollar qiymatidagi chekni yubordi. Bu haqda The New York Times ma’lumotiga asoslanib, Meduza xabar beradi.
Uning gaplariga ko‘ra, unga jurnal aniq qancha to‘laganini eslay olmaydi, lekin gap 5 mingdan 7 ming dollargacha bo‘lgan miqdor haqida ketmoqda. Glass soxtalashtirilgan barcha maqolalari uchun to‘langan gonorarlarni qaytarmoqchi ekanligini The New York Times nashriga ma’lum qilgan.
Stiven Glass 1990-yilning o‘rtalarida AQShning The New Republic nashrida ishlagan, shuningdek, boshqa nashrlarda ham maqola chop etib kelgan. 1998-yilda Forbes nashriyoti uning xakerlar haqidagi maqolasida shubhali dalillarni aniqladi. Ya’ni, jurnalistik tergov natijasida, maqolada keltirilgan qahramonlar va muhokama qilingan firma aslida mavjud emasligi hamda Glass tomonidan o‘ylab topilganligi aniqlangan edi.
2003-yilda Glassning tarjimai holi asosida “Stiven Glass uydirmasi” kinofilmi suratga olingan.
Uning firibgarliklari oshkor bo‘lgach, Glass jurnalistikani tark etib, advokatlik faoliyatini yuritish uchun litsenziya olishga harakat qilib ko‘rdi, biroq, axloqiy sabablarga ko‘ra, u bu kabi ishda ishlashga layoqatsiz deb topildi. So‘nggi yillarda Glass qonunchilik firmasida ishlab kelmoqda.
Izoh (0)