Germaniyalik ovchi Zimbabve janubi-sharqidagi Gonareju milliy bog‘ida yashagan filni otib o‘ldirdi. The Daily Telegraph’ning qayd etishicha, bu kabi yirik fil oxirgi marta bundan 30 yil avval o‘ldirilgandi.
Bog‘ xodimlarining so‘zlariga ko‘ra, 8-oktabr kuni ismi oshkor etilmayotgan germaniyalik 60 yoshli filni otib o‘ldirgan. Ov qilish uchun ruxsatnoma olish va jonivorni qonuniy yo‘l bilan o‘ldirish imkoniyatiga ega bo‘lish uchun u 60 ming dollarga yaqin pul to‘lagan.
Jonivorlarni himoya qilish bo‘yicha davlat tashkiloti — Zimbabwe Conservation Task Force’dan ma’lum qilishlaricha, fil tishlarining og‘irligi 55 kilogrammni tashkil etgan. Hajmining kattaligi sabab ularni yerda sudrashga to‘g‘ri kelgan.
21 kun davom etgan ov vaqtida Germaniya fuqarosiga mahalliy ovchi yordam bergan. “Ov yakuni haqida ‘yashillar’ nima deyishini bilaman, biroq bu qonuniy bo‘ldi, biz qonundan tashqariga chiqqanimiz yo‘q”, — dedi zimbabvelik ovchi.
Zimbabve professional ovchilar va gidlar uyushmasi raisi Lui Myullerning The Daily Telegraph’ga ma’lum qilishicha, ovchi filning tishlari juda katta ekanligini uni otib qo‘yganidan so‘ng fahmlagan.
Myullerning so‘zlariga ko‘ra, bog‘ xodimlari shu kungacha bu filni ko‘rmagan edi. Aks holda, o‘ziga xos kamyob turni ov qilish boshidan taqiqlangan bo‘lardi.
Nashrning qayd etishicha, jonsiz filning suratlari internetda tarqalib ketgan va ovchilarning olqishli, tabiat himoyachilarining esa tanqidli fikrlariga sabab bo‘lgan.
Izoh (0)