Chelyabinskning “Senturion” havaskor xokkey jamoasi o‘yinchisi Yevgeniy Perovskiy Tungi xokkey ligasi (TXL)ning o‘zi ishtirok etgan gala-uchrashuvi haqida so‘zlab berdi. Bu haqda “NewsRu.com” xabar bermoqda.
Rossiya prezidenti Vladimir Putinning tug‘ilgan kunida bo‘lib o‘tgan uchrashuvda ham professional, ham havaskor xokkeychilar, shuningdek, yuqori martabali davlat arboblari qatnashgan.
“Biz kiyim almashtirish xonasiga kirdik, u yerda bizning zo‘r maykalarimiz, getralarimiz bor edi, hammasi Kontinental xokkey ligasidagidek edi. O‘yin kamida bir soatga kechikishini aytishdi, qahva, choy olib kelishdi. Keyin murabbiy kelib, Putin o‘ziga qarshi havaskorlar o‘ynashini istayotganini aytdi. Bizdan tezgina jamoa tuzishdi, himoyada ‘Qozon ajdarholari’dan kelgan bolalar o‘ynadi, qanotda men va ‘Neoplan’ o‘yinchisi, markazda esa yana bir havaskor xokkeychi — Igor Butman harakat qildi”, — dedi Perovskiy.
Putinga qarshi, shuningdek, ishbilarmonlar Gennadiy Timchenko, Arkadiy va Boris Rotenberg, Moskva viloyati gubernatori Andrey Vorobyov, Tatariston rahbari Rustam Minnixanov, ishbilarmonlar Boris va Mixail Zingarevich, Tver viloyati gubernatori Andrey Shevelyov o‘ynadi.
Prezident jamoasini Vyacheslav Fetisov, Aleksey Kasatonov, Pavel Burye, Valeriy Kamenskiy, Aleksandr Mogilniy, Aleksey Jamnov, Aleksandr Yakushev va Sergey Makarov kabi taniqli xokkey ustalari, shuningdek, Rossiya mudofaa vaziri Sergey Shoygu kuchaytirdi.
“Albatta, maxsus ko‘rsatmalar ham berildi. Putinning oldida ‘yashil chiroqni yoqish’ kerakligini aytishdi. Uning oldida yiqilmaslikni, unga tasodifan urilib ketmaslikni so‘rashdi. Qolgan barcha masalada ‘haqiqiy o‘yin ko‘rsating’, deyishdi. Ikki marta o‘yinga berilib ketib, Putinning yonidan juda yaqin o‘tib ketdim. U menga shunday qarab, kulib qo‘ydi... Men o‘sha vaziyat videoyozuvini qayta-qayta ko‘rdim, juda g‘alati vaziyat yuzaga kelgan. Umuman olganda, o‘yindagi taassurotlarni so‘z bilan ta’riflab bo‘lmaydi”, — dedi havaskor xokkeychi.
Ma’lumot uchun, o‘z tug‘ilgan kunida bo‘lib o‘tgan mazkur uchrashuvda Putin yettita shayba soldi, uning jamoasi esa 15:10 hisobida g‘alaba qozondi.
Izoh (0)