Eron tashqi ishlar vaziri Muhammad Javod Zarif va uning germaniyalik hamkasbi Frank-Valter Shtaynmayer Xavfsizlik bo‘yicha Myunxen konferensiyasi maqsadli guruhi majlisi arafasida Tehronda o‘zaro muzokaralar o‘tkazdi. Bu haqda “TASS” xabar bermoqda.
Ma’lumot uchun, Tehronda 17-oktabr, shanba kuni Yaqin va O‘rta Sharq hamda Yevropa mamlakatlarining tashqi ishlar vazirlari, parlament qo‘mitalari rahbarlari va boshqa yuqori martabali vakillari ishtirokida xavfsizlikni ta’minlash sohasidagi mintaqaviy va xalqaro muammolarni norasmiy tartibda muhokama qilish maqsadida Xavfsizlik bo‘yicha Myunxen konferensiyasining maqsadli guruhi majlisi bo‘lib o‘tadi.
Konferensiyada Afg‘oniston tashqi ishlar vaziri Salohuddin Rabboniy, Iroq tashqi ishlar vaziri Ibrohim al-Ja’fariy, Iroq Kurdistoni bosh vaziri Nechirvan Idris Barzoniy, BMTning Suriya bo‘yicha maxsus vakili o‘rinbosari Ramzi Izzeddin Ramzi, Yevropa tashqi siyosat xizmati bosh kotibining siyosiy masalalar bo‘yicha o‘rinbosari Xelga Shmid, Fransiya parlamenti quyi palatasining Tashqi ishlar bo‘yicha qo‘mitasi raisi Elizabet Gigu va Bundestagning Tashqi ishlar bo‘yicha qo‘mitasi raisi Norbert Ryottgen, shuningdek, arab mamlakatlari hukumatlari vakillari va Yevropa mamlakatlari parlamentlari deputatlari qatnashadi.
50 yildan beri tashkil etib kelinayotgan Xavfsizlik bo‘yicha Myunxen konferensiyasi doirasida 2009-yildan buyon jahonning turli mamlakatlari poytaxtlari mintaqaviy muammolar muhokamasiga bag‘ishlab, maqsadli guruhlar uchrashuvlari o‘tkazilmoqda. Shunday guruhlarning so‘nggi majlislari Doha (2013), Nyu-Deli (2014) va Venada (2015) bo‘lib o‘tgandi. Tehrondan keyingi majlis 2016-yil aprelida Efiopiya poytaxti Addis-Abebada bo‘ladi.
Izoh (0)