Австралияда Малайзия султони Иброҳим Исмоил учун мўлжалланган юк машинаси ишлаб чиқилди. Luxurylaunches хабарига кўра, машина тақдимоти 15 октябрь, пайшанба куни Брисбендаги King George Square шоусида бўлиб ўтган.
Автомобиль Mack Trucks заводида ишлаб чиқарилган, унинг нархи маълум қилинмаяпти, бироқ нашрнинг тахминича, унинг нархи компаниянинг энг қиммат — қиймати 480 минг долларга тенг юк машинасидан ҳам қиммат.
Султон машинаси соатига 100 километр тезликда ҳаракатлана олади, кузов қизил-кўк рангларга бўялган ва султонлик рамзлари билан безатилган. Капот устига Иброҳим Исмоил ҳукмронлик қилувчи Жоҳор султонлиги рамзи — йўлбарснинг тилладан ишланган ҳайкалчаси ўрнатилган.
Автомобиль замонавий бор техникаси, телевизорга уланган олтита ташқи кузатув камералари билан таъминланган. Машина ичида қизил ёғоч ва мармардан ишланган ошхона бор, шунингдек, салонга матраси тилла ипдан тикилган икки қаватли каравот ҳам ўрнатилган.
Mack Trucks компанияси ўз фаолиятини 1900 йилда бошлаган бўлиб, юк машиналари, автобуслар ва троллейбуслар ишлаб чиқаришга ихтисослашган. Компания заводлари АҚШ, Австралия ва Венесуэлада жойлашган.
Жоҳор Малай ярим оролининг жанубида жойлашган бўлиб, Жоҳор-Бару шаҳри султонлик пойтахти ҳисобланади.
Изоҳ (0)