Mumbay politsiyasi shahar kasalxonalaridan birida 45 yoshli bemorning o‘limiga olib kelishi mumkin bo‘lgan hodisa yuzasidan tekshiruv olib bormoqda. “Segodnya.ua” xabariga ko‘ra, vafot etgan deb hisoblangan shaxs tanasi yorilishidan bir daqiqa avval hushiga kelgan.
Qayd etishlaricha, shahar avtobus bekatlarining birida bir erkak hushsiz holda topilgan. Tibbiyot xodimlari uni gospitalga olib borgach, navbatchi shifokor Rohan Roxekar tomir urishini tekshirmay, jabrlanuvchini vafot etgan, deya qayd etgan.
Mahalliy qonunchilikka ko‘ra, vafot etgan bemorning “qayta tirilishiga” imkoniyat berish uchun ikki soat davomida maxsus joyda saqlanishi lozim. Roxekar esa jasadni darhol o‘likxonaga eltishni buyurgan. Oradan biroz vaqt o‘tib, murdani yormoqchi bo‘lgan tibbiyot xodimlari bemor nafas olayotganini payqagan, “o‘lik” ham to‘satdan ko‘zini ochgan.
NDTV telekanalining xabar berishicha, yuz bergan voqea haqida xabar topgan navbatchi shifokor o‘lim haqidagi hujjatlarni yo‘q qilishga uringan, hodisa joyiga kelgan politsiyachilarni uzoq vaqt davomida xonasiga kiritmagan. Mazkur ish bo‘yicha surishtiruv olib borayotgan nazoratchining so‘zlariga ko‘ra, shifokorni jinoiy javobgarlikka tortish haqidagi qaror kasalxonadagi ichki tekshiruv yakuniga yetganidan so‘ng qabul qilinadi.
Gospital bosh shifokori Suleman Merchantning qayd etishicha, shifokorlar jabrlanganning tomir urishini sezmasligi mumkin, shuning uchun vafot etgani qayd etilgan bemor darhol o‘likxonaga olib borilmaydi. Uning qayd etishicha, Roxekar ish boshlaganiga hali ko‘p bo‘lmagan va u ko‘plab amaliyotlardan bexabar, shunga qaramay, unga xayfsan e’lon qilingan.
Ayni damda “qayta tirilgan” bemor to‘yib ovqatlanmaslik va aniqlangan infeksion kasallikka qarshi davolanmoqda.
Izoh (0)