Jahon chempionati—2018 ikkinchi saralash bosqichi, 5-tur doirasidagi Bahrayn – O‘zbekiston uchrashuvi oldidan matbuot anjumani tashkil etildi. O‘zbekiston milliy terma jamoasi bosh murabbiyi Samvel Babayan bilan birga anjumanda jamoa hujumchisi Marat Bikmayev ham qatnashdi, deb xabar beradi O‘zbekiston futbol federatsiyasi matbuot xizmati.
“Biz kuchli futbolchilarga va ayniqsa kuchli hujum chizig‘iga ega bo‘lgan jiddiy raqibga qarshi maydonga tushamiz. Shuningdek, ularning bosh murabbiyi ham mahoratli mutaxassis. Hozir bizning jamoa shunday ahvoldaki, har bir o‘yinda bizdan maksimal darajada e’tiborni bir joyga jamlab harakat qilish talab etiladi. Bu mening bosh murabbiy sifatida uchinchi o‘yinim va jamoa o‘yindan-o‘yinga kuchayib borishi kerak. Shu yo‘lda ish olib boryapmiz va o‘zimizning eng yaxshi o‘yinimizni namoyish etishga harakat qilamiz”, — dedi Samvel Babayan.
“Jamoalarning rasmiy o‘yinlardagi o‘zaro statistikasiga qaraydigan bo‘lsak, O‘zbekiston Bahrayn ustidan shu vaqtgacha g‘alaba qozona olmaganini ko‘rishimiz mumkin. Bo‘lajak o‘yinda yana shu an’ana davom ettiriladi, deb o‘ylaysizmi?”, – degan savolga javob berar ekan O‘zbekiston milliy terma jamoasi bosh murabbiyi shunday dedi: “Har qanday an’anaga qachondir chek qo‘yiladi. Ertaga O‘zbekiston terma jamoasi uchun noxush bo‘lgan bu g‘alabasiz seriyaga nuqta qo‘yiladi, deb umid qilamiz”.
Shundan so‘ng O‘zbekiston milliy terma jamoasi hujumchisi Marat Bikmayev ham bo‘lajak o‘yin haqida o‘z fikrlarini bildirib o‘tdi.
“Jamoamiz o‘yinga har tomonlama tayyor. Jismoniy holatimiz ham yaxshi darajada. Bu o‘yinda faqat g‘alaba uchun maydonga tushamiz. Bahraynga qarshi uchrashuv juda muhim va bu uchrashuvga yigitlar 100 foiz tayyor, deb o‘ylayman”.
Izoh (0)