Жаҳон чемпионати—2018 иккинчи саралаш босқичи, 5-тур доирасидаги Баҳрайн – Ўзбекистон учрашуви олдидан матбуот анжумани ташкил этилди. Ўзбекистон миллий терма жамоаси бош мураббийи Самвел Бабаян билан бирга анжуманда жамоа ҳужумчиси Марат Бикмаев ҳам қатнашди, деб хабар беради Ўзбекистон футбол федерацияси матбуот хизмати.
«Биз кучли футболчиларга ва айниқса кучли ҳужум чизиғига эга бўлган жиддий рақибга қарши майдонга тушамиз. Шунингдек, уларнинг бош мураббийи ҳам маҳоратли мутахассис. Ҳозир бизнинг жамоа шундай аҳволдаки, ҳар бир ўйинда биздан максимал даражада эътиборни бир жойга жамлаб ҳаракат қилиш талаб этилади. Бу менинг бош мураббий сифатида учинчи ўйиним ва жамоа ўйиндан-ўйинга кучайиб бориши керак. Шу йўлда иш олиб боряпмиз ва ўзимизнинг энг яхши ўйинимизни намойиш этишга ҳаракат қиламиз», — деди Самвел Бабаян.
«Жамоаларнинг расмий ўйинлардаги ўзаро статистикасига қарайдиган бўлсак, Ўзбекистон Баҳрайн устидан шу вақтгача ғалаба қозона олмаганини кўришимиз мумкин. Бўлажак ўйинда яна шу анъана давом эттирилади, деб ўйлайсизми?», – деган саволга жавоб берар экан Ўзбекистон миллий терма жамоаси бош мураббийи шундай деди: «Ҳар қандай анъанага қачондир чек қўйилади. Эртага Ўзбекистон терма жамоаси учун нохуш бўлган бу ғалабасиз серияга нуқта қўйилади, деб умид қиламиз».
Шундан сўнг Ўзбекистон миллий терма жамоаси ҳужумчиси Марат Бикмаев ҳам бўлажак ўйин ҳақида ўз фикрларини билдириб ўтди.
«Жамоамиз ўйинга ҳар томонлама тайёр. Жисмоний ҳолатимиз ҳам яхши даражада. Бу ўйинда фақат ғалаба учун майдонга тушамиз. Баҳрайнга қарши учрашув жуда муҳим ва бу учрашувга йигитлар 100 фоиз тайёр, деб ўйлайман».
Изоҳ (0)