Facebook ijtimoiy tarmog‘i mobil dasturida yuz bergan xatolik sabab bir qizning nomi bilan saytga kirgan amerikalik erkak oxir-oqibat shu qiz bilan oila qurdi. Bu haqda “Gazeta.ru” xabar bermoqda.
Shuler Benson 2009-yili o‘z mobil telefonidan Facebook’ga kirishga qaror qiladi. Biroq tushunarsiz xatolik sabab u ijtimoiy tarmoqqa foydalanuvchi Selesti Zendler sifatida kirib qoladi — erkak va qizning Facebook’da umumiy do‘stlari ham yo‘q edi.
Hayron qolgan Benson qizning sahifasida uning nomidan xabar qoldirib, uning kimligini va nima uchun uning profilidan Facebook’ga kirib qolganini so‘ragan. Shundan so‘ng erkak qizning profilidan chiqqan, biroq keyinroq aynan Zendlerdan do‘stlik taklifi kelgan.
Qiz ikki kundan so‘ng Bensonni do‘stlari qatoridan o‘chirib tashlamoqchi bo‘lgan, biroq keyinchalik ular o‘zaro yozishib ketgan. Amerikalik erkakning qayd etishicha, keyinchalik ular o‘rtasida “juda ko‘p o‘xshashliklar” borligi ma’lum bo‘ldi. 2013-yil iyunida ular va nihoyat yuzma-yuz ko‘rishgan.
2013-yil oxirida qiz Bensonning uyiga ko‘chib o‘tgan, shundan so‘ng ular birgalikda Janubiy Karolinaga ko‘chib, o‘sha yerda turmush qurgan. Erkakning so‘zlariga ko‘ra, u “ijtimoiy tarmoqdagi oddiy xato sharofati bilan hamkori, do‘sti, suyuklisini topdi”.
Izoh (0)