Janubiy Koreya 2045-yilgacha Oyda bazada qurishni rejalashtirdi. Bu haqda The Korea Times xabar beradi.
Mamlakatning bu qarori koinotni o‘rganish bo‘yicha uzoq muddatli milliy dastur doirasida amalga oshirilmoqda. Koreya aerokosmik administratsiyasi (KASA) Tejon shahridagi Koreya milliy tadqiqot jamg‘armasida anjuman o‘tkazib, unda mamlakatning koinotni o‘rganish rejalarini ommaga e’lon qilgan.
Unda aytilishicha, Yer orbitasi, Oy, heliosfera va kosmos alohida-alohida tadqiq qilinadi. Ushbu tadqiqot doirasida 5 ta missiya bajarilishi nazarda tutilgan. Xususan, Oyda mustaqil qo‘nish va harakatlanish texnologiyalarini rivojlantirish, Oy resurslaridan foydalanish va iqtisodiy faoliyat uchun infratuzilma qurilishi maqsad qilingan.
Ta’kidlanishicha, 2040-yilgacha logistika uchun yangi avlod Oyga qo‘nish qurilmasi ishlab chiqarish rejalashtirilgan. 2045-yilga kelib esa Oy iqtisodiy bazasini qurish maqsad qilingan. Quyosh va geliosferani o‘rganish quyosh faolligini kuzatish va kosmik xavfsizlikni oshirishni ko‘zda tutadi. Shuningdek, 2035-yilda Quyosh va Yerning tortishish kuchlari muvozanatlashgan “L4 Lagranj” nuqtasida quyoshni kuzatuvchi sun’iy yo‘ldoshni joylashtirish rejasi ham ma’lum qilingan.
Janubiy Koreya kosmosni tadqiq qilish sohasida sezilarli yutuqlarga erishib, global kosmik tadqiqotlarda o‘z o‘rnini mustahkamlashga intilmoqda. Bu jarayonda Koreya AeroKosmik tadqiqot instituti (KARI) va 2024-yilda tashkil etilgan KASA muhim rol o‘ynaydi.
Izoh (0)