LG Electronics va Google o‘zaro hamkorlikning yangi natijasi — Google’ning yangi Android 6.0 Marshmallow operatsion tizimida ishlaydigan Nexus 5X smartfonini rasman taqdim etdi.
Nexus 5X 5,2 dyuymli Full HD IPS displeyi bilan jihozlangan. Unda qo‘llanilgan In-Cell Touch texnologiyasi to‘g‘ridan-to‘g‘ri quyosh nurlari ostida ham tasvir yuqori sifatli bo‘lishini ta’minlaydi. Qualcomm Snapdragon 808 protsessori talab etilgan har qanday topshiriqni uzluksiz va oson bajarish imkonini beradi. C turidagi USB tufayli 10 daqiqa davomida olingan quvvat deyarli to‘rt soat avtonom tarzda ishlashni ta’minlaydi
Nexus 5X 12,3 megapikselli asosiy va 5 megapikselli old kamera bilan jihozlangan. Smartfon 4K kengaytmali videoni yozib olishi, shuningdek, sekinlashtirilgan harakat (slow motion) effektiga ega bo‘lish uchun tezlashtirilgan syomkani amalga oshirishi mumkin.
Nexus 5X xavfsizligi barmoq izini tanib olish tizimi — NexusImprint yordamida oshirilgan. Telefonni blokdan chiqarish uchun smartfon orqa panelidagi datchikka barmoq bilan bir marta tegish kifoya.
“Biz Google’ning eng zamonaviy operatsion tizimiga mos eng yaxshi qurilma yaratishga intilmoqdamiz va birgalikda erishgan natijamizdan faxrlanamiz”, — dedi LG Electronics Mobile Communications prezidenti Juno Cho.
Bugungi kundan AQSh, Kanada, Buyuk Britaniya, Irlandiya, Koreya va Yaponiyada Nexus 5X’ni Google Store orqali oldindan buyurtma qilish mumkin. 19-oktabrdan smartfon qariyb 40 ta mamlakatda sotuvga chiqadi. Google Store yoki mahalliy chakana do‘konlarda qurilma to‘rtinchi chorakda sotila boshlaydi. Narx-navo haqidagi qo‘shimcha ma’lumotlar yaqin haftalar ichida e’lon qilinadi.
Reklama huquqi asosida
Izoh (0)