Facebook ижтимоий тармоғи мобил дастурида юз берган хатолик сабаб бир қизнинг номи билан сайтга кирган америкалик эркак охир-оқибат шу қиз билан оила қурди. Бу ҳақда «Газета.ru» хабар бермоқда.
Шулер Бенсон 2009 йили ўз мобил телефонидан Facebook’га киришга қарор қилади. Бироқ тушунарсиз хатолик сабаб у ижтимоий тармоққа фойдаланувчи Селести Зендлер сифатида кириб қолади — эркак ва қизнинг Facebook’да умумий дўстлари ҳам йўқ эди.
Ҳайрон қолган Бенсон қизнинг саҳифасида унинг номидан хабар қолдириб, унинг кимлигини ва нима учун унинг профилидан Facebook’га кириб қолганини сўраган. Шундан сўнг эркак қизнинг профилидан чиққан, бироқ кейинроқ айнан Зендлердан дўстлик таклифи келган.
Қиз икки кундан сўнг Бенсонни дўстлари қаторидан ўчириб ташламоқчи бўлган, бироқ кейинчалик улар ўзаро ёзишиб кетган. Америкалик эркакнинг қайд этишича, кейинчалик улар ўртасида «жуда кўп ўхшашликлар» борлиги маълум бўлди. 2013 йил июнида улар ва ниҳоят юзма-юз кўришган.
2013 йил охирида қиз Бенсоннинг уйига кўчиб ўтган, шундан сўнг улар биргаликда Жанубий Каролинага кўчиб, ўша ерда турмуш қурган. Эркакнинг сўзларига кўра, у «ижтимоий тармоқдаги оддий хато шарофати билан ҳамкори, дўсти, суюклисини топди».
Изоҳ (0)