AQSh, Buyuk Britaniya va Germaniya aholisining yarmidan ko‘pi o‘zga sayyoraliklar mavjudligiga ishonadi. Bu haqda YouGov marketing kompaniyasi tadqiqotlari natijalariga tayanib, Live Science xabar bermoqda.
Nemislarning 56, amerikaliklarning 54 va britaniyaliklarning 52 foizi o‘zga sayyoralarda ham hayot borligini taxmin qiladi. So‘ralganlarning 58 foizi o‘zga sayyoraliklar Yerdan juda uzoqda joylashgani sabab ular bilan bog‘lanish amri mahol ekanligi, 57 foizi esa bunday aloqani o‘rnatish uchun insoniyatning texnologik taraqqiyoti yetarli darajada emasligini ma’lum qilgan.
Respondentlarning 24 foizi boshqa sivilizatsiya vakillari yerliklar borligi to‘g‘risida xabardorligi, biroq biz bilan bog‘lanmaslikni ma’qul ko‘rishini, 17 foizi esa o‘zga sayyoraliklar Yer bilan allaqachon aloqa o‘rnatgani, ammo rivojlangan davlatlar hukumatlari buni fuqarolaridan yashirishini ta’kidlaydi.
Ma’lum bo‘lishicha, erkaklar ayollarga nisbatan o‘zga sayyoraliklar borligiga ko‘proq ishonadi. Undan tashqari, erkaklarning 54 foizi o‘zga sayyoraliklar bilan munosabatlar o‘rnatishga urinishda davom etish lozimligini bildirsa, ayollar orasida bunday fikrdagilar atigi 40 foizni tashkil etdi.
Izoh (0)