AQSH prezidenti Donald Tramp 22-iyul kuni Yaponiya, Filippin va Indoneziya bilan savdo bitimlari tuzilganini ma’lum qildi. Bu haqda CNN xabar berdi.
Trampning Yaponiya bilan savdo shartnomasini tuzishi uzoq vaqtdan beri kutilayotgan edi. Unga ko‘ra, bitim doirasida Qo‘shma Shtatlarga eksport qilinadigan yapon tovarlariga 15 foiz boj tayinlanadi. Shu o‘rinda Yaponiya AQSHga 550 milliard dollar sarmoya kiritadi.
“Biz hozirgina Yaponiya bilan ulkan kelishuvni amalga oshirdik. Ehtimol, bu eng yirik kelishuvdir. Bunda AQSH foydaning 90 foiziga egalik qiladi. Ushbu bitim yuz minglab ish o‘rinlarini yaratadi — bunaqasi hech qachon bo‘lmagan. Eng muhimi, Yaponiya bilan avtomobil, yuk mashinalari, guruch va boshqa qishloq xo‘jaligi mahsulotlari bilan savdo qilish imkoni yaratiladi. U Qo‘shma Shtatlarga 15 foiz miqdorida bojlar to‘laydi”, deb yozgan Tramp Truth Social’da.
Yaponiya bosh vaziri Shigeru Ishiba Trampning bayonotiga javob berar ekan, hukumat bitim tafsilotlarini ehtiyotkorlik bilan o‘rganishini va zarurat tug‘ilganda AQSH prezidenti bilan telefon orqali yoki yuzma-yuz uchrashuv o‘tkazishini bildirgan. Ammo Tramp kabi, vazir ham aniq tafsilotlarni ommaga ochiqlamagan.
Yaponiya Qo‘shma Shtatlarning beshinchi yirik import manbai hisoblanadi. U 2024-yili AQSHga 148 milliard dollarlik mahsulot eksport qilgan. Avtomobillar, avtomobil ehtiyot qismlari, qishloq xo‘jaligi va qurilish mashinalari amerikaliklar Yaponiyadan ko‘p sotib oladigan mahsulotlar qatoriga kirardi.
Filippin bilan savdo bitimi va Indoneziya bilan kelishuv shartlari
Tramp 22-iyul kuni Filippin prezidenti Kichik Ferdinand Markos bilan savdo kelishuviga erishilganini ma’lum qilgan. Shu kuni prezident Indoneziya bilan ham savdo bitimining aniq shartlarini oshkor qilgan.
Ikkala kelishuvda ham AQSH ushbu davlatlardan import qiladigan tovarlarga 19 foizlik bojlar belgilanishi ko‘zda tutilgan. Shu bilan birga, Qo‘shma Shtatlar bu ikki davlatga yuboradigan tovarlariga hech qanday boj solinmaydi.
Donald Tramp Filippin bilan kelishuvni 22-iyul kuni Oq uyda prezident Kichik Ferdinand Markos bilan uchrashganidan so‘ng e’lon qilgan.
“Uchrashuv ajoyib o‘tdi va biz savdo bitimini yakunladik” deb yozgan Tramp ijtimoiy tarmoqdagi sahifasida.
Tramp jahon mamlakatlarining deyarli barchasiga savdo tariflarini o‘rnatayotgani sir emas. Jumladan, u avgust oyidan boshlab mis importi uchun ham 50 foizlik boj kuchga kirishini ma’lum qilgan. Bundan tashqari, Tramp 1-avgustgacha mamlakatlarni bitim tuzishga undab, agar shartnoma tuzilmasa, ularga juda yuqori tariflar joriy etilishi bilan tahdid qilib kelmoqda.
Izoh (0)