АҚШ, Буюк Британия ва Германия аҳолисининг ярмидан кўпи ўзга сайёраликлар мавжудлигига ишонади. Бу ҳақда YouGov маркетинг компанияси тадқиқотлари натижаларига таяниб, Live Science хабар бермоқда.
Немисларнинг 56, америкаликларнинг 54 ва британияликларнинг 52 фоизи ўзга сайёраларда ҳам ҳаёт борлигини тахмин қилади. Сўралганларнинг 58 фоизи ўзга сайёраликлар Ердан жуда узоқда жойлашгани сабаб улар билан боғланиш амри маҳол эканлиги, 57 фоизи эса бундай алоқани ўрнатиш учун инсониятнинг технологик тараққиёти етарли даражада эмаслигини маълум қилган.
Респондентларнинг 24 фоизи бошқа цивилизация вакиллари ерликлар борлиги тўғрисида хабардорлиги, бироқ биз билан боғланмасликни маъқул кўришини, 17 фоизи эса ўзга сайёраликлар Ер билан аллақачон алоқа ўрнатгани, аммо ривожланган давлатлар ҳукуматлари буни фуқароларидан яширишини таъкидлайди.
Маълум бўлишича, эркаклар аёлларга нисбатан ўзга сайёраликлар борлигига кўпроқ ишонади. Ундан ташқари, эркакларнинг 54 фоизи ўзга сайёраликлар билан муносабатлар ўрнатишга уринишда давом этиш лозимлигини билдирса, аёллар орасида бундай фикрдагилар атиги 40 фоизни ташкил этди.
Изоҳ (0)