Sotheby’s аукцион уйи камёб мовий бриллиант — Blue Moon («Мовий ой»)ни савдога қўйди. CNN’нинг қайд этишича, бриллиант 35—55 миллион долларга баҳоланган. Кимошди савдоси 11 ноябрь куни Женевада бўлиб ўтади.
Қимматбаҳо тошнинг оғирлиги 12,03 каратга тенг бўлиб, ўз таснифида энг йирикларидан бири ҳисобланади. Кимошди савдолари уйининг қимматбаҳо буюмлар бўйича халқаро бўлинмаси раиси Дэвид Беннеттнинг сўзларига кўра, бриллиант жуда ҳам тоза. Савдогача мазкур тош Гонгконг, Лондон ва Нью-Йоркда намойиш этилади.
«Мовий ой» 2014 йили Жанубий Африкадаги Куллинан конидан топилган, оғирлиги 29,60 карат бўлган олмосдан тайёрланган бўлиб, кейинчалик бу тош Cora International компаниясига 25,6 миллион доллар эвазига сотилган эди.
Ҳозирги кунда оғирлиги 24,78 каратга тенг The Graff Pink («Пушти Графф») кимошди савдо уйи савдолари вақтида сотилган энг қиммат бриллиант ҳисобланади. 2010 йили у 46,16 миллион долларга пулланган. 9,75 каратли Zoe Diamond («Зои бриллианти») эса энг қиммат сотилган мовий бриллиантдир — у 2014 йил ноябрида 32,65 миллион долларга сотилган.
Изоҳ (0)