AQSh maxsus xizmatlari tomonidan Rim papasi Fransiskning kelgusi haftaga belgilangan Qo‘shma Shtatlarga tashrifi chog‘ida ro‘y berishi mumkin bo‘lgan tajovuzning oldi olindi. Bu haqda Kongress vakillar palatasi milliy xavfsizlik qo‘mitasi rahbari Maykl Makkol ma’lum qildi, deya xabar bermoqda “Korrespondent.net”.
Ushbu ma’lumot yuqori darajali shaxslar qo‘riqlanishi uchun javob beradigan maxsus xizmatdan olinganini bildirgan kongressmen hodisaning to‘liq tafsilotlarini oshkor etishni istamadi.
Rim papasi 22—27-sentabr kunlari Vashington, Nyu-York va Filadelfiyaga tashrif buyuradi. U Vashingtonda AQSh prezidenti Barak Obama bilan uchrashadi, shuningdek, AQSh Kongressi vakillar palatasi va senatining qo‘shma yig‘ilishida ishtirok etadigan ilk Vatikan rahbari bo‘ladi.
Fransisk Nyu-Yorkda BMT Bosh Assambleyasida ma’ruza qilishi, Filadelfiyada esa muhojirlik masalalari va diniy erkinlik mavzusidagi chiqishi hamda diniy marosim o‘tkazishi rejalashtirilgan.
Izoh (0)