Yamandagi portga berilgan aviazarba natijasida Hindistonning olti fuqarosi halok bo‘ldi, 14 nafari qutqarib qolindi. Bu haqda “RIA Novosti” xabar bermoqda.
Hindiston Tashqi ishlar vazirligi maxsus vakili Vikas Svarupning ma’lum qilishicha, avvalroq bedarak yo‘qolgan, deb gumon qilingan yetti kishidan olti nafarining jasadi topilgan va harbiy gospitalga joylashtirilgan.
Qayd etishlaricha, halok bo‘lganlarning oila a’zolari jasadlarni Yamanning Xodeyda shahriga dafn etilishiga rozilik bildirgan. Svarupning qo‘shimcha qilishicha, hozircha bir kishi bedarak yo‘qolgan, deb gumon qilinmoqda, 14 hindistonlik esa Xodeydada, xavfsiz holatda turibdi.
Avvalroq Saudiya Arabistoni boshliq koalitsiya kuchlari Yamanning Qizil dengizdagi portiga — yonilg‘i kontrabandachilariga qarshi aviazarbalar bergani ma’lum bo‘lgandi. Xabar berishlaricha, aviazarbaga uchragan “Mustafo” va “Asmar” kemalarida jami 21 kishi bo‘lgan. Bedarak yo‘qolgan hindni izlash ishlari davom etmoqda.
Izoh (0)