Rossiya prezidenti Vladimir Putin Tojikiston yetakchisi Emomali Rahmon bilan telefon suhbatida respublikada sodir bo‘layotgan hodisalarni mamlakatdagi ichki vaziyatni beqarorlashtirishga urinish deb baholadi, deya xabar bermoqda Interfax Rossiya prezidenti matbuot kotibi Dmitriy Peskovga tayanib.
Putin Tojikiston rahbariyatiga dalda beruvchi gaplar aytib, Rahmon bilan Dushanbeda alohida uchrashuv o‘tkazishga kelishib oldi. U 15-sentabr kuni bo‘lib o‘tadigan Kollektiv xavfsizlik to‘g‘risidagi bitim tashkiloti sammiti doirasida o‘tkaziladi.
5-sentabr, shanba kuni Tojikistonda hukumat kuch tuzilmalarining mamlakat mudofaa vaziri sobiq o‘rinbosari Abduhalim Nazarzoda tarafdorlariga qarshi maxsus operatsiyalari o‘tkazildi. Guruhning 13 a’zosi yo‘q qilindi, yana 32 kishi qo‘lga olindi.
Nazarzoda va yana 7—8 kishi Dushanbedan 150 km naridagi Ramit darasiga yashiringan, ushbu hudud o‘rab olingan.
Tojikiston IIV matbuot xizmati rahbari Jaloliddin Sadriddinovning so‘zlariga ko‘ra, o‘tgan kunlar davomida Tojikiston mudofaa vazirining sobiq o‘rinbosari Abduhalim Nazarzoda boshliq terrorchilik guruhi tomonidan Vahdat shahridagi IIB binosi va Tojikiston Mudofaa vazirligi markaziy apparatiga uyushtirilgan ikki hujum natijasida 8 nafar militsiya xodimi halok bo‘lgan.
Izoh (0)