Россия президенти Владимир Путин Тожикистон етакчиси Эмомали Раҳмон билан телефон суҳбатида республикада содир бўлаётган ҳодисаларни мамлакатдаги ички вазиятни беқарорлаштиришга уриниш деб баҳолади, дея хабар бермоқда Interfax Россия президенти матбуот котиби Дмитрий Песковга таяниб.
Путин Тожикистон раҳбариятига далда берувчи гаплар айтиб, Раҳмон билан Душанбеда алоҳида учрашув ўтказишга келишиб олди. У 15 сентябрь куни бўлиб ўтадиган Коллектив хавфсизлик тўғрисидаги битим ташкилоти саммити доирасида ўтказилади.
5 сентябрь, шанба куни Тожикистонда ҳукумат куч тузилмаларининг мамлакат мудофаа вазири собиқ ўринбосари Абдуҳалим Назарзода тарафдорларига қарши махсус операциялари ўтказилди. Гуруҳнинг 13 аъзоси йўқ қилинди, яна 32 киши қўлга олинди.
Назарзода ва яна 7—8 киши Душанбедан 150 км наридаги Рамит дарасига яширинган, ушбу ҳудуд ўраб олинган.
Тожикистон ИИВ матбуот хизмати раҳбари Жалолиддин Садриддиновнинг сўзларига кўра, ўтган кунлар давомида Тожикистон мудофаа вазирининг собиқ ўринбосари Абдуҳалим Назарзода бошлиқ террорчилик гуруҳи томонидан Ваҳдат шаҳридаги ИИБ биноси ва Тожикистон Мудофаа вазирлиги марказий аппаратига уюштирилган икки ҳужум натижасида 8 нафар милиция ходими ҳалок бўлган.
Изоҳ (0)