Belarusdagi navbatdagi prezident saylovlarida amaldagi prezident Aleksandr Lukashenkoning, aftidan, uchta raqibi bo‘ladi. Bu haqda “Echo.msk.ru” xabar bermoqda.
Prezidentlikka nomzodlardan biri — zaxiradagi polkovnik, Vatanparvarlar partiyasi yetakchisi va Belarus kazaklari atamani Nikolay Ulaxovich to‘lig‘icha amaldagi prezidentni qo‘llab-quvvatlaydi. “Prezident saylovlarida muntazam ishtirok etib keladigan liberal-demokratlar yetakchisi Sergey Gaydukevichni ham siyosiy raqib deb aytish qiyin”, — deyiladi xabarda.
Yana bir ehtimoliy nomzod — “Haqiqatni so‘zla” harakatidan Tatyana Korotkevich bo‘lib, u o‘zini demokratik kuchlar vakilasi deb ataydi va islohotlar o‘tkazilishi tarafdoridir. Prezidentlikka nomzodlarning barchasi, xususan, Lukashenko ham zarur barcha hujjatlar va 100 ming nafardan saylovchining imzosini Markaziy saylov komissiyasi (MSK)ga taqdim etgan.
Hujjatlarni qabul qilish jarayoni 5-sentabr, shanba kuni yakuniga yetdi. Endi MSK nomzodlarni ro‘yxatga olgani haqidagi qarorini e’lon qilishi kerak. Bu 10-sentabr kuni yuz beradi. 11-sentabrdan esa saylovoldi tashviqoti boshlanadi.
Ekspertlarning fikricha, mazkur saylovda Lukashenkoga jiddiy raqib yo‘q. Mamlakat iqtisodiyotidagi vaziyat yomonlashayotganiga qaramay, Belarusda Ukraina ssenariysining takrorlanishi bilan bog‘liq xavotirlar sabab, Lukashenkoning reytingi so‘nggi oylarda faqat o‘sib bormoqda.
Eslatib o‘tamiz, Belarusdagi prezident saylovi 11-oktabr kuni bo‘lib o‘tadi.
Izoh (0)