Ўзбекистонда от спорти бўйича «Челленж» жаҳон кубогининг сиртқи босқичи бўлиб ўтади

5 сентябрь куни Халқаро от спорти федерацияси (FEI), Ўзбекистон Маданият ва спорт ишлари вазирлиги ҳамда Ўзбекистон от спорти федерацияси ҳамкорлигида «Челленж» жаҳон кубогининг минтақавий сиртқи босқичи ўтказилади. Бу ҳақда ташкилотчилар «Дарё»га маълум қилди.

Конкур – тўсиқлардан от сакратиш йўналишидаги мусобақалар 15 ёшдан катта спортчилар ўртасида икки тоифа бўйича ўтказилади: «А» тоифа 120—130 см баландликдаги тўсиқлар, «B» тоифа 110—120 см баландликдаги тўсиқлар.

«А» тоифасида максимал балл йиғган спортчилар 2016 йилда ўтказиладиган «Челленж» жаҳон кубогининг сиртқи финал босқичида иштирок этишга номзод бўлади. Жаҳон кубоги ғолиблари эса тўғридан-тўғри Олимпиада ўйинларига йўлланма олади.

5 сентябрь, 24 октябрь ва 14 ноябрь кунлари Ўзбекистонда «Челленж»нинг учта босқичи ўтказилади. Барча мусобақалар Бўстонлиқдаги «Аллюр» от спорти клубида бўлиб ўтади. Ўзбекистонлик спортчиларнинг рақиблари Марказий Осиё ва Яқин Шарқдан келган чавандозлар бўлади.