JCh va OK saralashi doirasida O‘zbekiston va Yaman terma jamoalari o‘rtasida kechgan uchrashuvdan so‘ng o‘tkazilgan matbuot anjumanining ikkinchi qismida Samvel Babayan ishtirok etdi, deb xabar beradi “Uff.uz”.
- Bu o‘yin muxlislarga yaxshi kayfiyat bag‘ishladi, deb o‘ylayman. G‘alaba nima qilganda ham g‘alaba. Biz hamkorlikda bu g‘alabaga erishdik. Osiyoda kuchli yoki kuchsiz jamoalar yo‘q, hamma o‘ynashni o‘rganib olgan. Biz hujumda yaxshi o‘ynadik. Ammo hali o‘zaro tushunib o‘ynash borasida muammolar bor. Muxlislarni xursand qilish uchun harakat qilamiz.
- Ikkinchi bo‘limda Jasur Hasanov maydonga tushgach, o‘yinni kuchaytirdi. U keyingi o‘yinda asosiy tarkibda o‘ynaydimi? Islom To‘xtaxo‘jayev esa o‘ng qanot himoyasida u qadar yaxshi o‘ynay olmadi.- Filippinga qarshi kechadigan o‘yinda maydonga tushadigan tarkibni faqat uchrashuv oldidan ma’lum qilamiz. Terma jamoadagi barcha yigitlar imkon qadar harakat qilmoqda. Bugungi o‘yinni ko‘rib chiqib, tarkib borasida xulosa chiqaramiz. Bugun meni xursand qilgan jihat – himoyada yaxshi o‘ynadik. E’tibor bergan bo‘lsangiz, KXDRga qarshi kechgan uchrashuvga nisbatan himoyada yaxshi o‘ynadik. Uch nafar yangi futbolchi himoyada maydonga tushdi va ular ishonchni oqladi.
- Jamoangiz maydon markazida tezkor hujum tashkil etish o‘rniga o‘zaro to‘p uzatishga harakat qildi. Bu esa tezkor o‘yinni buzib qo‘ydi.- Biz bu o‘yinda tezkor hujum tashkil etish haqida ko‘rsatma bergan edik. Maydon markazida to‘pni saqlab turish asosiy maqsadimiz bo‘lmagan. Bugun futbolchilar ilk bora bunday tarkibda maydonga tushdi. Bunday qisqa muddat ichida yaxshi o‘yin kutish qiyin.
- Bugun optimal tarkibni maydonga tushirganingizga shubha yo‘q. Ammo Sardor Rashidovning o‘yinidan ko‘nglingiz to‘ldimi?- Sardor hali yangi klubi safida birorta ham rasmiy o‘yinda maydonga tushmagan. Ammo u yaxshi o‘ynadi. Bugun siz boshqa Rashidovni ko‘rdingiz. U nafaqat hujumda, balki himoyada ham qay darajada mehnat qilganiga e’tibor qilgan bo‘lsangiz kerak.
- Bugun to‘plar nisbatini yaxshilab olish uchun imkoniyat bor edi. Ammo bu ishni faqat minimal tarzda amalga oshira oldingiz. Sanjar Tursunovni maydonga tushirishdan maqsad nima edi?- Sanjar Tursunov Vatanimiz sharafini xorijda himoya qilib yurgan yaxshi futbolchi. Bizda har bir futbolchining o‘yini haqida to‘liq ma’lumotlar bor. Biz futbolchilarni kuzatib boruvchi kompaniya bilan shartnoma imzolaganmiz va har bir futbolchining imkoniyati va statistikasi haqida ma’lumot olib turamiz. Sanjar Tursunovning UEFA Kubogi finalchisi “Dnepr” va “Shaxtyor”ga qarshi o‘tkazgan o‘yinlarini ko‘rganmiz. Bu futbolchining saviyasiga shubha bo‘lishi mumkin emas.
- Guruhda har bir raqib jiddiy, ammo eng kuchsiz jamoa Yaman ekani ko‘rinib turibdi. Keyingi o‘yinda nimaning hisobiga o‘yinni kuchaytirmoqchisiz? Zaxiradan tushib o‘yin taqdirini hal qiladiganlar yana bormi?- Kimdir zaxiradan maydonga tushib, o‘yinni kuchaytiradi, deyish noto‘g‘ri. Asosiy kuch bu hamjihatlikda. Agarda siz Yamanni Koreya va Filippinga qarshi o‘tkazgan o‘yinlarini ko‘rgan bo‘lsangiz, u qadar jiddiy qarshilik bo‘lmaganini ko‘rasiz. Bugun esa ular himoyada ancha kuchli o‘yin namoyish qildi. Aksincha, himoyaga yotib olmaydigan jamoalarga qarshi kechadigan o‘yinlarda bizga u qadar qiyin bo‘lmaydi, deb o‘ylayman.
Izoh (0)