ЖЧ ва ОК саралаши доирасида Ўзбекистон ва Яман терма жамоалари ўртасида кечган учрашувдан сўнг ўтказилган матбуот анжуманининг иккинчи қисмида Самвел Бабаян иштирок этди, деб хабар беради «Uff.uz».
- Бу ўйин мухлисларга яхши кайфият бағишлади, деб ўйлайман. Ғалаба нима қилганда ҳам ғалаба. Биз ҳамкорликда бу ғалабага эришдик. Осиёда кучли ёки кучсиз жамоалар йўқ, ҳамма ўйнашни ўрганиб олган. Биз ҳужумда яхши ўйнадик. Аммо ҳали ўзаро тушуниб ўйнаш борасида муаммолар бор. Мухлисларни хурсанд қилиш учун ҳаракат қиламиз.
- Иккинчи бўлимда Жасур Ҳасанов майдонга тушгач, ўйинни кучайтирди. У кейинги ўйинда асосий таркибда ўйнайдими? Ислом Тўхтахўжаев эса ўнг қанот ҳимоясида у қадар яхши ўйнай олмади.- Филиппинга қарши кечадиган ўйинда майдонга тушадиган таркибни фақат учрашув олдидан маълум қиламиз. Терма жамоадаги барча йигитлар имкон қадар ҳаракат қилмоқда. Бугунги ўйинни кўриб чиқиб, таркиб борасида хулоса чиқарамиз. Бугун мени хурсанд қилган жиҳат – ҳимояда яхши ўйнадик. Эътибор берган бўлсангиз, КХДРга қарши кечган учрашувга нисбатан ҳимояда яхши ўйнадик. Уч нафар янги футболчи ҳимояда майдонга тушди ва улар ишончни оқлади.
- Жамоангиз майдон марказида тезкор ҳужум ташкил этиш ўрнига ўзаро тўп узатишга ҳаракат қилди. Бу эса тезкор ўйинни бузиб қўйди.- Биз бу ўйинда тезкор ҳужум ташкил этиш ҳақида кўрсатма берган эдик. Майдон марказида тўпни сақлаб туриш асосий мақсадимиз бўлмаган. Бугун футболчилар илк бора бундай таркибда майдонга тушди. Бундай қисқа муддат ичида яхши ўйин кутиш қийин.
- Бугун оптимал таркибни майдонга туширганингизга шубҳа йўқ. Аммо Сардор Рашидовнинг ўйинидан кўнглингиз тўлдими?- Сардор ҳали янги клуби сафида бирорта ҳам расмий ўйинда майдонга тушмаган. Аммо у яхши ўйнади. Бугун сиз бошқа Рашидовни кўрдингиз. У нафақат ҳужумда, балки ҳимояда ҳам қай даражада меҳнат қилганига эътибор қилган бўлсангиз керак.
- Бугун тўплар нисбатини яхшилаб олиш учун имконият бор эди. Аммо бу ишни фақат минимал тарзда амалга ошира олдингиз. Санжар Турсуновни майдонга туширишдан мақсад нима эди?- Санжар Турсунов Ватанимиз шарафини хорижда ҳимоя қилиб юрган яхши футболчи. Бизда ҳар бир футболчининг ўйини ҳақида тўлиқ маълумотлар бор. Биз футболчиларни кузатиб борувчи компания билан шартнома имзолаганмиз ва ҳар бир футболчининг имконияти ва статистикаси ҳақида маълумот олиб турамиз. Санжар Турсуновнинг УЕФА Кубоги финалчиси «Днепр» ва «Шахтёр»га қарши ўтказган ўйинларини кўрганмиз. Бу футболчининг савиясига шубҳа бўлиши мумкин эмас.
- Гуруҳда ҳар бир рақиб жиддий, аммо энг кучсиз жамоа Яман экани кўриниб турибди. Кейинги ўйинда ниманинг ҳисобига ўйинни кучайтирмоқчисиз? Захирадан тушиб ўйин тақдирини ҳал қиладиганлар яна борми?- Кимдир захирадан майдонга тушиб, ўйинни кучайтиради, дейиш нотўғри. Асосий куч бу ҳамжиҳатликда. Агарда сиз Яманни Корея ва Филиппинга қарши ўтказган ўйинларини кўрган бўлсангиз, у қадар жиддий қаршилик бўлмаганини кўрасиз. Бугун эса улар ҳимояда анча кучли ўйин намойиш қилди. Аксинча, ҳимояга ётиб олмайдиган жамоаларга қарши кечадиган ўйинларда бизга у қадар қийин бўлмайди, деб ўйлайман.
Изоҳ (0)