Budapeshtdagi Keleti vokzalida 3-sentabr, payshanba kuni tongda noqonuniy muhojirlar Avstriya va Germaniyaga boruvchi poyezdlarga chiqishga urinib, tartibsizlik keltirib chiqardi. “RBK”ning qayd etishicha, mahalliy ma’muriyat ovoz kuchaytirgichlar orqali g‘arbiy yo‘nalishda poyezdlar harakati to‘xtatilganini e’lon qilgan.
1-sentabr, seshanba kuni Vengriya muhojirlarni poyezdlarga chiqarishni taqiqlab qo‘ydi. Bunga qarshi qochoqlar Keleti vokzali oldida norozilik namoyishi uyushtirib, Vengriya hukumatidan ularni Germaniyaga o‘tkazib yuborishni talab qildi.
Rasmiy Berlin 2015-yilda mamlakatga keladigan muhojirlar soni 800 ming kishiga yetishidan xavotirda — bu bir yil avvalgi ko‘rsatkichdan to‘rt barobar ko‘p. Bloomberg’ning qayd etishicha, qochoqlarni ta’minlash uchun Germaniyaga milliardlab yevro kerak bo‘ladi.
Germaniya, Avstriya va Fransiya boshpana istagidagi muhojirlarning Yevropa Ittifoqi mamlakatlari bo‘ylab teng taqsimlanishini istamoqda. Buyuk Britaniya va Yevropa Ittifoqining Sharqiy Yevropadagi a’zolari esa ko‘plab muhojirlarni qabul qilishga rozi emas.
Xususan, Vengriya bosh vaziri Viktor Orbanning Yevropa parlamenti spikeri Martin Shults bilan muzokaralarda ma’lum qilishicha, qochoqlar bilan bog‘liq inqiroz Yevropa Ittifoqi emas, bakli faqat Germaniyaning muammosidir, chunki muhojirlarning hech biri Vengriyada qolmoqchi emas — ularning bari Germaniyaga ketishni istamoqda.
Izoh (0)