Будапештдаги Келети вокзалида 3 сентябрь, пайшанба куни тонгда ноқонуний муҳожирлар Австрия ва Германияга борувчи поездларга чиқишга уриниб, тартибсизлик келтириб чиқарди. «РБК»нинг қайд этишича, маҳаллий маъмурият овоз кучайтиргичлар орқали ғарбий йўналишда поездлар ҳаракати тўхтатилганини эълон қилган.
1 сентябрь, сешанба куни Венгрия муҳожирларни поездларга чиқаришни тақиқлаб қўйди. Бунга қарши қочоқлар Келети вокзали олдида норозилик намойиши уюштириб, Венгрия ҳукуматидан уларни Германияга ўтказиб юборишни талаб қилди.
Расмий Берлин 2015 йилда мамлакатга келадиган муҳожирлар сони 800 минг кишига етишидан хавотирда — бу бир йил аввалги кўрсаткичдан тўрт баробар кўп. Bloomberg’нинг қайд этишича, қочоқларни таъминлаш учун Германияга миллиардлаб евро керак бўлади.
Германия, Австрия ва Франция бошпана истагидаги муҳожирларнинг Европа Иттифоқи мамлакатлари бўйлаб тенг тақсимланишини истамоқда. Буюк Британия ва Европа Иттифоқининг Шарқий Европадаги аъзолари эса кўплаб муҳожирларни қабул қилишга рози эмас.
Хусусан, Венгрия бош вазири Виктор Орбаннинг Европа парламенти спикери Мартин Шульц билан музокараларда маълум қилишича, қочоқлар билан боғлиқ инқироз Европа Иттифоқи эмас, бакли фақат Германиянинг муаммосидир, чунки муҳожирларнинг ҳеч бири Венгрияда қолмоқчи эмас — уларнинг бари Германияга кетишни истамоқда.
Изоҳ (0)